Еттің бағасы неге шарықтап барады?
Нарықтың байламы болмаған қазіргі уақытта азық-түліктің бағасы жиі құбылып тұр. Әсіресе тұрғындар жиі тұтынатын азық-түлік түрлерінің арзандайтын түрі жоқ. Соның бірі – ет. Төрт түліктің баршасының бағасы төмен емес. Оның ішінде қой және сиыр еті аспандап кетті.
Ет бағасының қымбаттауы қала тұрғындарына өте ауыр соғып отырғаны белгілі. Жалпы алғанда қаланың тұрғындары үшін төрт түлік малдың өнімін тұтыну жылдан жылға қиындап барады. Өткен аптада «Қайқармет» базарының ет сататын бөлігіне арнайы бардым. Сиыр мен қой етінің килограмы 3500 теңгеден. Жылқының етінен де қымбат. «Көбірек алсаңыз, 3400 теңгеге түсеміз ғой. Қатып қалған баға жоқ», – деп саудагерлер лыпып тұр. Аталған базарға жақын «Ислам ет» дүкенінде де сиыр етінің килограмы 3400 теңге.
Мұндай бағаны қарапайым қала тұрғындарының қалтасы көтере бермейді. Сонан соң тауық етін қанағат тұтады. Тауық етінің килосы да 1800 теңгеден түспей тұр. Соғымның кезінде тұрғындар жылқы, сиыр сойған үйден жіліктеп ет алады. Кейінгі уақытта сойылатын ірі қара бағасы да өршіп тұрғаны ойлантады.
Сиыр мен қой еті бағасының қымбаттауына ет экспортының артуы әсер еткен екен. Ол туралы Талас аудандық ауыл шаруашылығы бөлімінің бас маманы Ауданбек Ерубайдан сұраған едік.
Біз ет бағасына қатысы бар басқарманы іздеген едік. Ауыл шаруашылығы басқармасының мамандары «Біз бұған жауап бермейміз» деп, ат-тондарын ала қашты. Әйтпесе, ет дегеніңіз мал өнімі емес пе?
Малға жауапты ауыл шаруашылығы басқармасы емес пе? Айналып келгенде ет бағасына жауапты кәсіпкерлік және индустриалды- инновациялық дамыту басқармасы болып шықты. Басқарма басшысы Аспандияр Сейсебаевтың тікелей өзіне хабарласқан едік. Ол жылы сөйлескенімен, беруге тиіс ақпаратты созып жіберді.
Ақыр аяғында бөлім басшысы да емес, сауда және сыртқы экономикалық байланыс бөлімінің бас маманы Жомарт Нохан қысқаша ғана жауап берді.
Ол жауапта:
Кәсіпкерлікке жауапты басқарманың бұл жауабына да шүкір дедік. Дегенмен бас маман еттің қымбаттағанын айтқанымен, осы жағдайдан шығу жолдарын көрсетпепті.
Жаңағы «Мыңбұлақ» базарындағы (9 шағынаудан) «Ет» павильонында сиыр етінің килосы 2800 теңгеге сатылып жатқанынан қала халқы толық хабардар ма? Егер тұрғындар көбірек барса ол ет жеткілікті мөлшерде бола ма? Осы сұрақтың жауабын ешқандай жауаптылардан ала алмадық. Одан да басқа сауалдар аз емес. Сырт мемлекеттерге экспортталғандықтан ет қымбаттады деп қарап отыра беру қаншалықты дұрыс? Әлем бойынша ет қымбаттады деп шарықтаған бағаға басымызды шұлғи береміз бе? Не істеу керек енді?
Есет ДОСАЛЫ