Ұстаздығы бір төбе, ұсталығы бір төбе
Мемлекет басшысы қай кезде де кәсіпкерлерді қолдап, олардың ісінде кедергі болмауы керектігін айтып келеді. Атап айтқанда, отандық бизнес өкілдерімен кездесуінде ел Президенті: «Мемлекет бизнестің дамуы үшін барынша қолайлы жағдай жасайды. Жекеменшіктің толық қорғалуын қамтамасыз етеді. Өз кезегінде кәсіпкерлер салық төлеу, экономикаға инвестиция құю, жұмыс орындарын ашу, қызметкерлерге қолайлы орта қалыптастыру секілді міндеттерді адал орындауы тиіс» деп атап көрсетті. Нәтижесінде қазіргі таңда ауылдық жерлерде де кәсіпкерлікке бет бұрғандар саны көбейіп отыр. Солардың бірі – Жарлысу ауылының тұрғыны Азамат Сәмбетқұлов.
Азамат Қадырбекұлының тіркеме жасау ісімен айналыса бастағанына 11 жыл өтіпті. Әуелі жалғыз өзі айына бір тіркеме құрастырып, тәжірибе жинақтап жүрді. Тіркемелері сапалы шыққандықтан, ауыл тұрғындары қызығушылықтарын жасырмағаны рас. Алғашқы тапсырыс та ауылдастарынан түсті. Осылайша, он жыл бойы кәсібін жалғыз өзі жүзеге асырып, бұйырған табысын қанағат тұтқанына ауылдастары куә. Себебі Азаматтың аталған ауылдағы орта мектепте де жұмысы бар. Физика пәнінен сабақ береді. Шәкірттеріне физика саласының формулаларын үйрете жүріп, кәсіпке ден қойғаны да – еңбеккештігі. Қазіргі таңда бір тіркеменің бағасы 600 мың теңге мен 1,5 миллион теңге аралығын құрайды. Осы қаржының 20-25 пайызы шығынға жұмсалады.
Былтырдан бері Азамат Сәмбетқұлов «Ақәділ» жеке кәсіпкерлігі аясында тіркеме жасау цехын ашты. Қазіргі таңда айына 20-25 тіркеме жасап шығаруға мүмкіндік алды. Цехта 12 жігіт жұмыс істейді. Оларға атқарған жұмыстарының сапасына қарай 250 мың және 400 мың теңге аралығында жалақы төленуде. Әрине, ауыл тұрғыны үшін 400 мың теңге жақсы жалақы деп айтуға болады.
Мұндағы жұмысшылардың барлығы да ынталы. Алтай Нарымбетов пен Береке Мамырқұловтың еңбек өтілдері жоғары, озаттар қатарында.
Біз осы орайда облыс әкімдігі кәсіпкерлік және индустриялды-инновациялық дамыту басқармасына қарасты кәсіпкерлікті мемлекеттік қолдау және индустриялды-инновациялық дамыту бөлімінің басшысы Дамир Досаляновтан кәсіпкерге қолдау көрсетудің тәртіптері туралы сұраған едік.
Ал Т.Рысқұлов ауданы әкімдігі кәсіпкерлік және өнеркәсіп бөлімінің басшысы Сақтаған Әбенұлының өз айтары бар.
Басқарма өкілінің сөзінен де біраз нәрсені ұғып, бағдарладық. Әрине, әр жағдайдың тәртібі бар. Қоғамда әртүрлі құндылықтарға қажеттілік туындайды. Қазіргі таңда тіркеменің қажеттілігі жоғары. Әр азамат өзінің саласына қарай түрлі талабын қойып, тапсырыс береді. Сол талаптың үдесінен шығу табанды еңбекті қажет етеді. Аталған цех халықаралық деңгейдегі сол талаптарға сай жұмыс істеуде. Мұндай цехтардың іріленгені пайдалы. Осындай жаңа өндіріс орнына қолдау керек-ақ.
Есет ДОСАЛЫ
Т. Рысқұлов ауданы