Қызғалдақ – табыс пен берекеге бастай бергей

Көктем келе салысымен, Ұлы даланың әрбір сайы мен қырқасы қызыл-жасыл кілемдей түрленіп, ерекше сұлулыққа бөленетіні ақиқат. Әсіресе сәуір мен мамыр айларында ел-жұрт самал желмен дірілдей құлпырған қызыл, сары, ақ, алқызыл қызғалдақтарды көруге асығады. Кешегі сенбіде қойнауы құтқа толы қарт Қаратаудың бөктерінде кезекті рет «Қызғалдақ мұрасы» халықаралық фестивалі ұйымдастырылып, жұртшылық қыр мен сайға сән берген көздің жауын алар қып-қызыл қызғалдақтарды көзбен көруге мүмкіндік алды. Бұл күні Талас ауданындағы Есейхан ауылының қойнауы тек қана облыс тұрғындарына ғана емес, сонымен қатар Германия, Украина, Қырғызстан, Нидерланд, Ресей, Қытай, Түркия және Үндістаннан келген қонақтарға да толды. Фестивальге экожүйе мамандары, ЮНЕСКО өкілдері, консулдық және дипломатиялық корпус мүшелері, Мәжіліс депутаттары мен мемлекеттік органдардың өкілдері қатысты. Бес мыңға жуық адамның басын біріктірген ауқымды іс-шараны облыс әкімі Ербол Қарашөкеев құттықтау сөзбен ашты.