Еңбек адамын қолдау – ең басты бағыт
Кәсіподақтар – еңбек адамының құқықтарын қорғау, оның лайықты тұрмыс сапасы мен жұмыс жағдайын қамтамасыз ету жолында мәртебелі миссия атқаратын аса маңызды заманауи қоғамдық институттың бірі. Бүгінгі күні осы институттың облысымыздағы кәсіподақ орталығының жұмысы республикада өзге өңірлерге үлгі боларлықтай. Оны Қазақстан Республикасы Кәсіподақтар федерациясының «Кәсіподақ десанты» өкілдерімен «Жамбыл облысы оқу-ағарту, ғылым және жоғары білім қызметкерлерінің жергілікті кәсіптік одағы» қоғамдық бірлестігінің мәжіліс залында өткен жиында да аңғару қиын болмады.
Қазақстан Республикасы Кәсіподақтар федерациясы төрағасының орынбасары Қайрат Айбосынов пен фракцияның құқықтық қамтамасыз ету және халықаралық ынтымақтастық департаментінің директоры Тимур Нұғманов жұмыс сапары барысында алдымен білім қызметкерлерінің жергілікті кәсіподақ ұйымының жұмысымен танысты. Жергілікті кәсіподақ төрағасы Ерұлан Мағзымбеков қоғамдық бірлестіктің құрылғаннан бастап, бүгінге дейін атқарылған ішкі және сыртқы жұмыстарымен жеке-жеке таныстырып, ұжым қызметкерлерінің атқарып отырған шаруасын баяндай келіп, республикада екінші жыл қатарынан үздік кәсіподақ ұйымы атанғанын атап өтті.
Мұндағы атқарылған жұмыс пен ұжым қызметкерлерінің кәсібилігіне федерация өкілдері жоғары баға берді. Келелі жиын білім қызметкерлерінің жергілікті кәсіподақ үйінің мәжіліс залында жалғасты. Оған Кәсіподақтар федерациясының өкілдері, салалық, жергілікті және бастауыш кәсіподақ ұйымдарының төрағалары, кәсіподақ белсенділері мен бұқаралық ақпарат құралдары өкілдері қатысты. Жиынды Жамбыл облысы кәсіподақ орталығының төрағасы Бағлан Қарашолақов ашып, жүргізді.
Алдымен сөз алған Қайрат Айбосынов Қазақстан Республикасы Кәсіподақтар федерациясының қолға алып, атқарып жатқан жұмыстарымен таныстырды.
Ал фракцияның құқықтық қамтамасыз ету және халықаралық ынтымақтастық департаментінің директоры Тимур Нұғманов өз саласы бойынша ақпараттармен бөлісті. Сондай-ақ жиын барысында жергілікті кәсіподақ мүшелері тарапынан қойылған сұрақтарға заң шеңберінде жауап берілді. Жиын соңы марапаттауға ұласты.
Марат ҚҰЛИБАЕВ