Құнанбайдың ауылынан жеткен құнды мұра
Ел ішіндегі көне жәдігерлерді жинау барысында аудандық музейлердің алатын орны ерекше. Бұл орайда әр ауылдың көзі қарақты азаматтары, мұғалімдер мен мектеп оқушылары да аянып қалмайды. Сондай құнды жәдігерге толы мекеменің бірі – Сарысу аудандық тарихи-өлкетану музейі.
Бір қуанарлығы, елдің әжесіне айналған көнекөздер жеті атасынан сақталып келе жатқан құндылыққа құрметпен қарайды. Мәселен, Саудакент ауылының 83 жасар тұрғыны Ақбай Ысқаққызы қандай бағалы жәдігердің де көпшіліктің игілігіне айналғанын қалайды. Талай келіннің үлгілі де құрметті апасына айналған қарт осыдан 7 жылға жуық уақыт бұрын желтоқсан айының 12-сі күні аталған аудандық музейге сонау дәуірлерден келе жатқан ағаш табақты жәдігер ретінде өткізіпті. Бұл жәдігердің тарихы кім кімді де қызықтырардай. Ақбайдың әкесі Ысқақ болса, оның әкесі – Мәулен, Мәуленнің әкесі – Өте. Міне, осы Өте деген кісі заманында болыс болып, ел басқарған екен. Өтенің әйелі – Тәті.
Әйгілі Құнанбай қажының арғы атасы Ырғызбай. Тәті Құнанбайдың інісі Өксікбайдың ерке қызы екен. Тәті ұзатылғанда бүкіл жасауын алтынмен аптап, күміспен қаптап әзірлепті. Одан бөлек қыздың абыройы үшін бір келе түйені сыйлық ретінде Өтенің ауылына айдатып жіберіпті. Бір келеде кемінде 30 түйе болады екен. Ырғызбай әулеті әр қызына жасаудан бөлек 30 түйеден жөнелткенде малдың есебі жоқ бақуатты кісілер болғанын аңғара беруімізге болады. Бұл ағаш табақ – Тәті әжеміздің артынан сән-салтанатымен келген қымбат бұйымдардың бір бөлшегі ғана. Қалған заттар беріге дейін қолданыста болып, көпшілігі сыйға берілген. Қолда қалғаны тозығы жеткен осы ағаш табақ болса керек.
Бұл туралы Ақбай Ысқаққызының айтары бар.
Ал, аталған музей директоры Эльмира Көкішева мұндай іске қолдау білдіруге дайын.
Биыл Құнанбай қажы өмірге келгелі 221 жыл өтіпті. Інісі Өксікбай одан бірер жас ғана кіші болар. Құнанбай баласы Тәкежанмен қатарлас десек те есептен шатаса қоймаспыз. «Елу жылда ел жаңа, жүз жылда қазан» деген нақылды назарға алсақ, үш ғасырға жуық қолданыста болған, әйгілі Ырғызбай әулетінің ағаш табағын бүгінгі жас ұрпақтың көріп өсуі керек-ақ. Себебі, жасөспірім балаларға мұның өзі ерекше әсер сыйлайтыны анық.
Есет ДОСАЛЫ
Сарысу ауданы