Бала күту орталықтары ата-ана тәрбиесін алмастыра ала ма?
«Бәріміздің илегеніміз – бір терінің пұшпағы» дегендей қазіргінің ата- әжесінің де, әке-шешесінің де көксегені – жұмыс істеп, бала-шағаның қамын күйттеу. Бүгінгінің ата-аналары күнкөрістің қамы үшін керек десе екі-үш жерде жұмыс істеуде. Бірақ, үйдегі балалар қараусыз қалуда. Баяғыдай ертегі айтып отыратын ата-әжелер жоқтың қасы. Балаларға қазір балабақшалар мен бала күтуші орталықтары жауапты. Бүгінде тойға бару не бір жерге шығу үшін балаңызды қарайтын адам болмаса ұл-қызыңызды бала күтуші орталығына қалдырып, табыстап кетсеңіз болады.
Таразда алғаш рет «Няня» деп аталатын бала күтуші орталығы ашылды. Жаңадан ашылған орталықтың жұмысын бастағанына небәрі үш ай. «Ақбұлақ» шағынауданында орналасқан орталық аядай ғана. Енді ғана ашылғандықтан болар, бала саны аз. Шағын орталықтың иесі Нұргүл Шайысламованың бұл алғашқы кәсібі.
Шағын ғана екі бөлмеден тұратын орталықта баланы ұйықтататын және ойнататын бөлме де бар. Мұнда асхана жоқ. Өйткені, бұл балабақша емес. Ата- аналар ең көбі 3-4 сағатқа қалдырады екен. Сол аралықта баланың жейтін банан, пюре, айран секілді жеңіл асы мен ішетін сусынын өздері ала келеді.
Жасы елуден асқан бала күтуші Нүрила Бекжігітованың мұнда жұмыс істеп жатқанына үш ай. Тоғыз айдан асқан сәбилерден бастап алты жасқа дейінгі балаларды қабылдайтын ол жұмысы өзіне ұнайтынын айтты.
Шындығында іші сәулетті, жарық, жып-жылы екен. Бірлі-екілі бөпелер ойнап жүр. Кейбірі тәтті ұйқының құшағында. Бірақ, баланы жәутеңдетпей өз ата-апасы не жақын туысы қарап, тәрбиелегеніне ештеңе жетпейді. Бәлкім, мұндай орталықтар ананың ісін жеңілдететін шығар. Не де болса жақсылыққа жориық. Ашылған кәсіпке береке берсін.
Эльмира БАЙНАЗАРОВА