Облыстың ауыз сумен қамту деңгейі жүз пайызға жетеді
Халықты ауыз сумен қамтамасыз ету және су қорын келешек ұрпаққа сақтау үшін жан-жақты шаралар қабылдау – бүгінгі күннің басты міндеттерінің бірі. Суды таза және жеткілікті мөлшерде ұсыну – әлеуметтік тұрақтылық пен экономикалық дамудың негізгі факторларының бірі саналады. Елімізде ауыз сумен қамтамасыз ету мәселесі ерекше назарда. Президент тапсырмасына сәйкес, өңірлерді дамытудың ұлттық жобасы аясында биылғы жылы халықты 100 пайыз таза ауыз сумен қамту көзделген.
Бұл бағыттағы жұмыстар өңірде де кешенді түрде жалғасын тауып келеді. Облыс әкімі Ербол Қарашөкеевтің төрағалығымен өткен аппараттық кеңесте аталған бағыттағы атқарылған жұмыстар сараланды. Еске сала кетсек, өткен жылдың қорытындысымен облыста елді мекендердің 98,1 пайызы сапалы ауыз сумен қамтылған болатын. Облыс әкімдігі энергетика және тұрғын үй-коммуналдық шаруашылық басқармасының басшысы Ғалым Исақовтың айтуынша, биыл көрсеткіш толығымен орындалмақ.
Басқосуда облыс әкімі Ербол Қарашөкеев ауыз сумен қамтудың төмен деңгейі қалыптасқан бірқатар аудан әкімдерінен есеп алып, жыл соңына дейін Жол картасында көрсетілген міндемелердің орындалуы қажеттігін баса айтты.
Аппараттық кеңес қорытындысы бойынша аймақ басшысы жауаптыларға мердігерлердің жұмысын қатаң бақылауда ұстау керектігін айтты.
Бұдан бөлек, кеңесте жүктелген тапсырмалардың орындалу көрсеткіші сараланып, бірқатар бағытта бюджеттік шығыст арды қысқарту бойынша тапсырмалар жүктелді. Атап айтқанда, облыс әкімі мәдениет нысандарын салу, әкімшілік ғимарат құрылыстары, қызметтік автокөлік пен жиһаздар, іс- шара шығындарын қысқартып, жыл соңына дейін барлық мемлекеттік органдарда штат санының лимитін ұлғайтуды тоқтатуды тапсырды.
Нұрболат АМАНБЕК