Тәрбиелі жастар – қоғам тірегі

«Баласағұн» орталық концерт залында «Тәрбиелі жастар – қоғам тірегі» тақырыбында жастар форумы өтті. Республика Ішкі істер министрлігі 2025 жылды «Құқық бұзушылықтың алдын алу жылы» деп жариялауына орай ұйымдастырылған, негізгі бағыттарының бірі – жастармен белсенді жұмыс істеп, олардың құқықтық сауатын арттыру, профилактикалық жұмыстарды күшейтіп, жол қауіпсіздігін қамтамасыз ету болып табылатын іс-шара тақырыпқа сай әр адамға терең ой салатын сахналық көрініспен басталды. Форумды Қазақстанның Еңбек сіңірген қайраткері Әділ Ахметов жүргізіп отырды.
Жастардың қоғамдағы орны мен болашағы туралы ой қозғап, оларды тәрбие арқылы оң бағытқа тәрбиелеу мәселелерін талқылаған маңызды алаң болып табылатын жиында облыс әкімі Ербол Қарашөкеев сөз сөйлеп, жамбылдық жалынды жастарға ізгі тілегін арнады.
Облыс әкімі биыл жұмысшы мамандықтары жылы деп жарияланғанын айта келе, осы бағытта өңірде еңбек адамының беделі мен еңбек жолын дәріптеу мақсатында бірқатар шаралар мен жобалар жүзеге асырылып жатқанына, жас ұрпақты адал азамат етіп тәрбиелеу бүгінгі күннің басты талабы екеніне және ұлттық бірегейлігімізді нығайтып, еліміздің жаңа институттарын орнықтыру үшін жүйелі жұмыс жасаудың маңыздылығына тоқталды.
Форумда сөз сөйлеген Парламент Мәжілісінің Халықаралық істер, қорғаныс және қауіпсіздік комитетінің мүшесі Ерболат Саурықов Парламент қабырғасында еліміздің білім-ғылым саласына, жалпы қоғамдағы келеңсіздіктер мен түрлі болып жатқан оқиғаларға және олардың алдын алуға қатысты көптеген заңдардың, соның ішінде ата-ана мен бала құқығын қорғау туралы заң қабылданғанын айтса, облыстық полиция департаментінің бастығы Бақытжан Малыбаев өз сөзінде жастарға құқық бұзушылықтың зардабы ауыр болатынын ескертіп, жаман әрекеттерден аулақ болуға шақырды.
Жастар форумына арнайы шақырылған спикерлер – белгілі спортшы, Парламент Мәжілісі VIII шақырылымының депутаты, ережесіз жекпе-жектен Қазақстанның еңбек сіңірген спорт шебері Ардақ Назаров, танымал журналист-блогер Өркен Кенжебек, ақын, аудармашы, Қазақстан Жазушылар одағының мүше сі Абай Қалшабек және белгілі қоғам қайраткері Оразгүл Асанғазықызы сөйлеп, «Ел болам десең, бесігіңді түзе» қағидатын ұстана отырып, жастар тәрбиесін күшейту, ата-ана мен бала арасындағы қарым-қатынастың маңыздылығын нығайтып, жалпы отбасы құндылықтарын арттыру, жастарды жаман әдеттерден, соның ішінде құқық бұзушылық әрекеттерден аулақ болуға тәрбиелеу жайында кеңінен әңгімеледі.
Жиын соңында қазақ өнеріндегі театр және кино әлемінің бір топ тарландарының қатысуымен «Алаш» қазақ зиялыларының театрлық көрінісі көрсетіліп, ұлттық дәстүрді ұлықтап жүрген «Алашұлы» тобының орындауында «Батырлар ұраны», «Атамекен» әндері шырқалды.
Жүрсінгүл ЖАҚЫП