«Кедергісіз келешек» жобасы аясында бос жұмыс орындар жәрмеңкесі өтті
Жамбыл облысында партияның «Кедергісіз келешек» партиялық жобасы аясында ерекше қажеттілігі бар жандарға арналған бос жұмыс орындар жәрмеңкесі өтті, деп хабарлайды aqjolgazet.kz
Шараға «AMANAT» партиясы Жамбыл облыстық филиалының төрағасы Дауыл Бейсенқұлов, Жамбыл облыстық мәслихатының депутаты Анар Бексұлтанова, Жамбыл облысы әкімдігі жұмыспен қамтуды үйлестіру және әлеуметтік бағдарламалар басқармасы еңбек мобильділігі орталығының директоры мамандары, Тараз қалалық мәслихатының депутаттары мен жұмыс беруші мекемелер қатысты. Жәрмеңке барысында өңірдің 200-ге жуық мүмкіндігі шектеулі азаматтары жұмыс берушілермен тікелей сұхбаттасуға мүмкіндік.
Іс-шараның ашылу салтанатында партия Жамбыл облыстық филиалының төрағасы Дауыл Бейсенқұлов жәрмеңкенің басты мақсаты жұмыссыз жүрген мүмкіндігі шектеулі жандарды, нәтижелі жұмыспен қамту екенін жеткізді.
Жәрмеңке барысында жұмыс іздеп келген тұрғындар жұмыс берушілермен тікелей сұхбаттасып, өздеріне ыңғайлы жұмыстар қарастырды. Араларында тұрақты жұмысқа орналасқандар да бар. Мәселен, Тараз қаласының тұрғыны, ІІ топтағы мүмкіндігі шектеулі жан Назира Ақылова жәрмеңке арқылы тұрақты жұмысқа орналасты.
Жалпы, 40 мекеме қатысып 131 бос жұмыс орындарын ұсынған жәрмеңкеде 20-ға жуық азамат жұмысқа орналасты. Олардың қатарында қайтарымсыз грантқа ниет білдірген азаматтар да бар.
Айта кетейік, өткен жылы Жамбыл облысында «Кедергісіз келешек» партиялық жобасы аясында 35 бос орындар жәрмеңкесі ұйымдастырылды. Осы арқылы ерекше қажеттіліктері бар 96 азамат тұрақты жұмыспен қамтылса, 63 азамат уақытша жұмысқа орналасты. Ал, биыл жыл соңына дейін жоба аясында 50 бос орындар жәрмеңкесін ұйымдастыру арқылы 3000 мың адамды қамту жоспарда.