Тауарлық несиелеу бағдарламасы: Ауыл тұрғындарына 100 бас мал берілді
Жамбыл облысында алғашқылардың бірі болып Шу ауданының тұрғындары мал өсіруге тауарлық несие алды.
Мемлекет басшысы Қасым-Жомарт Тоқаев өз Жолдауында ауыл шаруашылығы саласына жаңа құрал – «тауарлық несиені» енгізу мәселесін қарастыруды тапсырған болатын.
Жаңа бағдарламаның мақсаты – ауылдық елді мекендерде мал басын көбейту. Облыс әкімдігі ауыл шаруашылығы басқармасы басшысының орынбасары Төлебек Құлекеевтің айтуынша, несие шарты бойынша ауыл тұрғындары мал басын одан әрі өсіру үшін тауарлық несие алады. Аз қамтылған отбасылар мен жұмыссыз азаматтарды қолдауға басымдық беріледі.
Тауарлық несиесі 5 жыл ішінде өтелуі керек, оның бірінші жылы – демалыс, одан кейін жыл сайын – төлдің 50 пайызы негізінде өтем төлеуге міндеттеледі.
Бағдарламада ауыл шаруашылығы жануарларын сақтандыру шарты және кепіл көзделген, бірақ бұл тармақтар міндетті емес, тек екі тараптың келісіміне сәйкес жүзеге асады.
Жергілікті кәсіпкерлер тауарлық несие беруге дайын екендіктерін білдірді (кемінде 30 бас ұсақ мал, 15 бас мүйізді ірі қара, 10 бас жылқы).
Тауарлық несиелеу бағдарламасы аясындағы алғашқы келісім Шу ауданында жасалды.
«Атай» шаруа қожалығының иесі Сәкен Атаев Абай ауылының тұрғыны Қалисұлтан Тілепбергеновке 50 бас (құны - 3 миллион теңге), ауыл азаматы Бақытжан Ботаевқа 3 миллион теңгеге 50 бас қой тұқымын берді.
Қалисұлтан Тілепбергенов тауарлық несиелеу тетігін тиімді пайдаланып, ауылдық ағайынға қолдау көрсетпек.
Жаңа бағдарлама аясында өңірдің барлық аудандарында түсіндіру жұмыстары жүргізілуде. Мойынқұм ауданында «Үркер» шаруа қожалығы 20 бас ірі қара мен 100 бас уақ мал беруге дайын. Қазір белсенді ауыл тұрғындарының тізімі жинақталуда.
Тауарлық несиелендіру бағдарламасы аясында жыл соңына дейін 80-ге жуық келісімге қол қою жоспарлануда.
Облыс әкімінің баспасөз қызметі.