Екі мыңнан аса мүмкіндігі шектеулі азамат жұмыспен қамтылды
«Еңбек бәрін де жеңбек», расында да солай. Мүмкіндігі шектеулі кісілерді бейімдеуде еңбек терапиясының қолданылуы да осының айғағы болса керек. Елімізде мүгедек азаматтарды жұмыспен қамту жүйелі түрде жүзеге асырылады. Мәселен, өткен жылы облысымызда 2163 мүмкіндігі шектеулі жандар жұмыспен қамтамасыз етілген.
Жалпы әлеуметтік салада, оның ішінде жұмыспен қамтуды үйлестіру және әлеуметтік бағдарламалар басқармасына қарасты мансап орталықтарына 2024 жылы 2566 мүмкіндігі шектеулі азамат жүгініпті. Осы санаттағы жұмыспен қамтылған азаматтардың ішінде 639 адам уақытша жұмыс орындарына орналастырылған.
«Мүгедектігі бар азаматтар үшін жұмыс орындарын квоталау» тұрақты жұмыспен қамту бағыты бойынша ағымдағы жылы 57 адам бекітілген. Дегенмен, 58 адам квота бойынша жұмысқа орналастырылып, жоспар 101,7 пайызға орындалыпты. Сондай- ақ, мүгедек азаматтарға арнайы жұмыс орнын ұйымдастыру бағыты бойынша 11 адамды еңбекке тарту жоспарланып, толық жүзеге асырылған.
Әрине, мүгедектігі бар азаматтарға берілетін зейнетақы бар, дегенмен, өзі еңбектеніп тапқан табысының жөні бөлек. Әрі еңбектену қоғаммен тығыз байланыста болып, белсенді өмір сүруге жетелейді. Халқымыздың «Балық берме, қармақ бер» дегені осыған саяды.
Қамар ҚАРАСАЕВА