Қоғам

Отбасы мәселесі — ортақ жауапкершілік

The final spritzer

Уақыт ағымы алға қарай жарық жылдамдығымен зырғыған сайын замана көші де, ондағы сан ғасырлар бойы бұлжымай келе жатқан ұлттық құндылықтар да түрліше құбылып келеді. Бұған тойтарыс беретін мықты сана, мығым болмыс жоқ секілді. Өкінішке қарай, қазір ел ішінде үй болмай жатып ұясы бұзылған жас отбасылар көп. Ал оларға тағылым айтар үлкендер де даналық үдесінен шыға алмай жататыны жасырын емес. Осы бір күрмеулі мәселені сан қырынан саралап, екі буын арасында сабақтастық орнату үшін «Анаға тағзым» отбасын қолдау орталығында «Отбасы берекесі — имандылықта» тақырыбында жас отбасылармен кездесу өтті.

Тәлімі мен тағылымы мол шараның басты мақсаты – бұғанасы енді бекіп жатқан, шаңырақтарын кеше ғана көтерген, өмір өзенінің асау толқынына төтеп беруде тәжірибелері жетпей жатқан жас отбасыларға кеңес беру, ұлттық құндылықтар негізіндегі тәлім-тәрбиенің маңызын арттыру, қоғамның ең маңызды әлеуметтік институтына құрмет көрсету болды. Кездесуді облыстық Ардагерлер кеңесі төрағасының орынбасары Жаңабай Миллионов алғысөзбен ашып, облыс әкімі жанындағы Әйелдер істері және отбасылық демографиялық саясат жөніндегі комиссияның хатшысы Зәуре Тұрғынова кіріспе сөз сөйледі. Аталмыш шараны «Анаға тағзым» отбасын қолдау орталығының директоры, ҚХА жанындағы Аналар кеңесінің төрайымы Эльмира Мырза-Ғали жүргізіп отырды.

Бұдан соң сөз М.Х.Дулати атындағы Тараз университетінің аға оқытушысы, «TALDAU» социологиялық және маркетингтік зерттеулер орталығының төрағасы Бақыт Әлмұратов қазіргі қоғамдағы отбасында кездесетін түйіткілді мәселелерге шолу жасады.

Әрі қарай келелі сөздің кезегі облыс әкімдігінің «Дін проблемаларын зерттеу орталығының» инспекторы Нұрдос Рахымжанға беріліп, ол «Қазақ даласындағы отбасы институты» тақырыбында баяндама жасап, отбасы құндылықтарына қатысты халқымыздың тарихы мен дәстүрлерінен мысалдар айтты.

Өнегелі әңгіменің ауаны «Әулие-ата» мешітінің бас имамы Ержан Аманбаевқа бұрылып, ол отбасында ерлі-зайыптылардың бақытты әрі тату болу жолдарын санамалап көрсетіп, өзінің ой-пікірін ортаға салды.

Одан әрі «Ана үйі» қоғамдық қорының координаторы Айнұр Ажибекова жеке адам өмірінің маңызды бастауы, рухани өзегі – отбасы екенін айта отырып, өз ойларын ортаға салды. «Қазақстан» ТРК Жамбыл облыстық филиалының редакторы Қасымжан Байкүшіков БАҚ-тағы отбасы мәселесіне арналған бағдарламаларды тілге тиек етіп, өнегелі отбасы моделіне сүйене отырып, шаңырақ шаттығын кіргізу әр адамның ізгі міндеті екенін алға тартты. Пікір алмасу алаңында Жамбыл облыстық ардагерлер кеңесі «Аналар алқасының» төрайымы Хадиша Оспанова, филология ғылымдарының кандидаты, профессор Сейсекүл Исматова, ардагер ұстаз Кәмилаш Ахметжанова, «Руханият, талдау, ақпарат және мониторинг орталығы» қоғамдық бірлестігінің жетекшісі Үртай Сапақова жас отбасылармен өз тәжірибесімен бөлісіп, отбасы құндылықтарын сақтау бойынша пікірлерін ортаға салды. Жастар да үлкендер ұлағатын ұйып тыңдап, шара соңында өзара пікір алмасты.

 

Арайлы ЖАҚСЫЛЫҚ