Қауіпсіздікті сақтау қай кезеңде де маңызды
Өңірлік коммуникациялар қызметінің ақпарат алаңында өткен кезекті баспасөз конференциясында облыстық төтенше жағдайлар департаменті бастығының орынбасары Руслан Орынбеков балық аулау кезеңіндегі қауіпсіздік және пиротехникалық бұйымдарды сатуға, пайдалануға қойылатын талаптар тақырыбы төңірегінде хабарлама жасады.
Баяндамашының айтуынша, балық аулау кеңінен дамыған біздің өңірде 112 тоған мен 100-ден астам өзен бар. Балықшылардың ең көп шоғырлануы Шу, Талас, Аққөл, Билікөл, Тасөткел, Теріс-Ащыбұлақ және Ынталы су қоймаларында байқалады. Балықшылардың қауіпсіздігін қамтамасыз ету және судағы жазатайым оқиғалардың алдын алу мақсатында жыл басынан бері 800-ден астам рейдтік іс-шаралар ұйымдастырылған. Профилактикалық іс-шаралар аясында 8 мыңнан астам ақпараттық материал таратылып, қауіпсіздік ережелері туралы ақпараттандыру акциялары жүргізілген.
Департамент басшысының орынбасары 1-31 желтоқсан аралығында облыста өрт қауіпсіздігі айлығы өтіп жатқанына тоқталды. Оның шеңберінде профилактикалық шаралар мен тексерулер саны артқан. Бұл жұмыстардың нәтижесінде өткен жылмен салыстырғанда өрт саны 4,3 пайызға азайған. Сонымен қатар, әлеуметтік осал топтардың үйлерінде көміртегі тотығы мен табиғи газ датчиктерін орнату бойынша белсенді жұмыс жүргізілуде.
Жүрсінгүл ЖАҚЫП