Жастар – мемлекеттік қызмет мінберінде
Елімізде жастар кадрлық резервін қалыптастыру мемлекеттің негізгі басты бағыттарының бірі. Осы мақсатта биылдан бастап аймақтарда өңірлік кадр резерві қалыптаса бастағаны белгілі. Жастарға қолдау көрсету мен олардың әлеуетін арттыру мақсатында іске асқан жоба жас мемлекеттік қызметшілерді дайындауда да негізгі рөл атқарып келеді. Бұл жайында «Жігерлі жастар – ел болашағы» атты облыстық жастар форумында жан-жақты айтылды.
Форумда өңірлер арасындағы ең үлкен бәсекелестік жастар үшін жүргізіліп жатқандығын атап өткен аймақ басшысы биыл 26 дарынды жастан іріктелген өңірлік кадр резерві қалыптастырылғандығын атап өтті.
Сондай-ақ, жиында М.Х.Дулати атындағы Тараз университетінің ректоры Мұхтар Байжұманов жоғары оқу орны тарапынан жастарға жан-жақты қолдау көрсетіліп жатқандығын атап өтті.
Сонымен бірге Ш.Мұртаза атындағы Халықаралық Тараз инновациялық институтының ректоры Махметғали Сарыбеков жас мемлекеттік қызметшілердің бойында болуы тиіс моральдық құндылықтарға тоқталды.
Бұдан өзге форумда Президенттік жастар кадр резерві жобасының резервшісі, «Тараз» Әлеуметтік-кәсіпкерлік корпорациясының директоры Берік Манасов пен Президент жанындағы Мемлекеттік басқару академиясы облыс бойынша филиалының директоры Ғазиз Қосыбаев Президенттік және өңірлік жастар кадр резервіне іріктеу және аталған жобалардың жастарға берер мүмкіндіктерін атап өтті.
Нұрболат АМАНБЕК