Еңбекшілерге қамқор азамат
Еліміздің өркениет көшіне ілесіп, дамыған, бәсекеге қабілетті те қауқарлы мемлекет болуы қазіргі жастардың қолында. Осынау асыл мұратқа жету үшін жастардың білімді, жан-жақты, алғыр да, ізденімпаз болуы – жастарға жүктелген негізгі міндет деп білеміз. Білімді, іскер жастар қай салаға да серпін беріп жүр. Сондай белсенді азаматтың бірі – Мақсат Чекаев.
Ол қазіргі мақсаттарын кәсіподақ қызметімен байланыстырған. Дегенмен, осы уақытқа дейін әскери салада қызмет етіп келді. Атап айтқанда, 2009-2011 жылдар аралығында Қарулы Күштер қатарында №0112 әскери бөлімінде әскери борышын атқарып, 2011-2016 жылдар аралығында №38 гвардиялық десанттық-шабуылдаушылар бригадасының арнайы жасақталған батальон құрамында қызмет етті. Әскери салада жүргендіктен, спортқа да өте жақын.
Мақсат Жұмаханұлы 2017-2021 жылдар аралығында Шу қаласындағы «Тарлан» спорт кешенінде таэквондо үйірмесінде аға жаттықтырушы, 2021 жылдан осы уақытқа дейін Шу ауданы әкімдігінің дене шынықтыру және спорт бөлімінің бұқаралық спорттық іс-шаралар өткізу орталығында нұсқаушы әдіскер болды. Таэквондодан спорт шеберлігіне үміткер.
2021 жылы Шу аудандық дене шынықтыру және спорт бөліміне қарасты бұқаралық спорттық іс-шаралар өткізу орталығы ашылды. Жастардан құралған мекемеде бүгінде 29 адам қызмет етеді. Жаңадан ашылған мекеменің жастары кәсіподақ ұйымын құру туралы шешім қабылдағаны құптарлық іс. Мекеменің кәсіподақ төрағалығына Мақсат Жұмаханұлын бірауыздан сайлап, оған үлкен сенім артылды. Содан бері де біраз жыл өтті. Ол өзін еңбекшілер мүддесін жақсы білетін белсенді кәсіподақ жетекшісі ретінде көрсете білді. Оны әріптестері іскер кәсіподақ көшбасшысы деп мақтан тұтады. Өзінің негізгі жұмысымен қатар, осы мекеменің бастауыш кәсіподақ ұйымының төрағасы ретінде жұмысшылардың мүддесін қорғау үшін лайықты жұмыс істеуде. Өз саласының білгір маманы, сонымен қатар өзге саладан да хабары бар жан. Топпен жұмыс істей білетін, адамдардың пікірімен санасатын, сөздің тобықтай түйінін шығара білетін көшбасшы.
Ұжымдағы қызметкерлердің мүддесін қорғайтын кәсіподақ атты іргелі ұйымның барына және оның жұмысына кәсіподақ мүшелері үлкен сенім білдіреді. Өйткені, кәсіподақ ұйымы еңбек дауларының алдын алады. Аталған мекеменің кәсіподақ мүшелері де кәсіподақ ұйымына арқа сүйеп, қолдау көріп отыр.
Сонымен қатар, спорттық-мәдени іс-шараларды сауатты ұйымдастыра білетін және әрдайым кәсіподақ тарапынан өтетін облыстық шараларға да белсенділік танытып, үнемі қатысушылардың қатарынан табылатын Мақсат ауданда түрлі ашық турнирлерге, жарыстарға, фестивальдерге жастардың басын қосып, ұйымшылдыққа жетелеп жүр. Бұл да кәсіподақ жетекшісінің іскерлігі деп айтуға болады.
Есет ДОСАЛЫ