Ауыл спортын дамытуға арналған дода
Алтын бесік ауылға көңіл бөлу қай кезде де маңызды. Алыс елді мекенде білім алып жүрген балалардың қабілетін дамыту қашанда өзекті. Осы мақсатта өңірімізде бірқатар игі жұмыстар, жарқын жоспарлар жүзеге асып келеді. Солардың қомақтысы – «AUYL SPORTY-24» ауыл балаларына арналған өңірлік лига.
Байзақ ауданы, Сарыкемер ауылында орналасқан №8 облыстық мамандандырылған балалар мен жасөспірімдер спорт мектебінің базасында түдігін түрген жарыстың ашылу салтанатына облыс әкімінің орынбасары Серік Сәлемов қатысып, сөз сөйледі. Ол: «Өздеріңіз білетіндей, талай спорт саңлақтары ауылдан шыққан. Оның ішінде Байзақ ауданының ауылдарын ерекше атап өтуге болады. Байзақ топырағынан грек-рим күресінен Олимпиада чемпионы Жақсылық Үшкемпіров, бокстан әлем чемпиондары Болат Жұмаділов, Асланбек Шымбергенов, футбол жұлдызы Нүркен Мәзбаев шыққаны да сөзімізге дәлел. Қазіргі таңда Мемлекет басшысының қолдауымен ауыл спортының дамуына ерекше көңіл бөлініп келеді. Міне, бүгін жалауын көтерген өңірлік лиганың да дарынды спортшы балаларды шыңдау үшін маңызы зор. Біздің өңірден шыққан үздік балалар республикалық кезеңде де топ жара берсін деп тілеймін. Осы жарысқа демеушілік танытқан «Халық» қайырымдылық қорының өкілдеріне алғыс білдіремін», – деді. Мұнан соң спорт ардагері Тәуірбек Қарауылтегі, бокстан КСРО спорт шебері Асқар Бекбауов ауыл балалары ойынына сәттілік тіледі. Ізін ала М.Х.Дулати атындағы Тараз өңірлік университетінің студент жастарынан құралған «Намат» тобы өнер көрсетті.
Жалпы лигаға бокс, еркін күрес, каратэ, баскетбол, волейбол, шахмат секілді 6 спорт түрінен, облыс көлемінде 8-15 жас аралығындағы 600 ауыл балалары мен жасөспірімдері қатысты. Бокстан Нұртас Әлімбай, каратэден Ерсұлтан Ағыбаев, еркін күрестен Найл Зейналов, шахматтан Бекарыс Айдарұлы, волейболдан қыздар арасында Әсел Жақсылық, ұлдар арасында Бекасыл Әбдір, баскетболдан қыздар арасында Нурика Коштык, ұлдар арасында Нұрасыл Сансызбай үздік спортшы атанды. Шахматтан өңірлік лига чемпионы атанған Айя Орынтайқызы: «Жарыс өте тартысты өтті. Мұндай бәсеке ауыл балалары үшін өте қажет. Республикалық кезеңге жолдама алғаныма қуаныштымын» дейді.
Өңірлік лигада жеңімпаз және жүлдегер атанған спортшылар мен команда ойыншыларының барлығы арнайы диплом, сыйлықтармен марапатталып, спорттық формалармен және жаттығу құралдарымен жабдықталды. Сонымен бірге 1-орын алған спортшылар мен командалар бұл сыйлықтардан бөлек, Алматы қаласында жоспарланған республикалық «AUYL SPORT – 2024» лигасына қатысуға мүмкіндік алды. Ол жарыс барысында да «Халық» қайырымдылық қоры облыс құрамасын қаржылай қолдайтын болады.
Есет ДОСАЛЫ
Байзақ ауданы