Балалар қауіпсіздігі – басты назарда
Балалар қауіпсіздігін қамтамасыз ету – бүгінгі күннің басты мәселесі. Оның ішінде, балалар арасындағы қылмыс пен құқықбұзушылық фактілерінің алдын алу оңтайлы профилактикалық шараларды жүзеге асыру айрықша назар аударуды талап етеді. Облыс әкімінің орынбасары Серік Сәлемовтің төрағалығымен өткен облыс әкімдігі жанындағы кәмелетке толмағандардың істері және олардың құқықтарын қорғау жөніндегі комиссияның кеңейтілген отырысында балалар арасында қылмыс және құқық бұзушылық жасаған жасөспірімдерді оңалту бағытындағы жұмыстардың жайы айтылды.
Аталған комиссия кәмелетке толмағандарға қатысты аутодеструктивті мінез-құлықты диагностикалау, олардың діни сауаттылығын көтеру, еңбегін пайдалануда заң талаптарының орындалу барысын қадағалап, өнерге баулу, спорттық секциялармен қамтуды жүзеге асырады. Соның е себінен қылмыстық көрсеткіштердің төмендеуіне ықпал етеді. Мәселен, Тараз қаласы әкімінің орынбасары Қайрат Исмаилдың сөзінше, оңтайлы іске асырылған профилактикалық шаралардың нәтижесінде өткен жылмен салыстырғанда шаһарда жасөспірімдер қылмысы 5,1 пайызға қысқарған.
Сонымен қатар, қала әкімінің орынбасары балалар құқығын қорғауды күшейту, тұрмыстық зорлық-зомбылыққа қарсы іс-қимылдың алдын алу мақсатында 2023-2024 жылдарға арналған «Тараз қауіпсіз қала» жобасы аясында іс-шаралар атқарылып, жасөспірімдер арасындағы суицидтің алдын алу және олардың құқықтары мен салауаттылығын қамтамасыз ету жөніндегі 2023-2025 жылдарға арналған кешенді жоспарының «Жол картасына» сәйкес, психологиялық-педагогикалық консилиум құрамында білікті педагог-психологтар жұмыс істеп жатқандығын атап өтті.
Бұдан бөлек, жиында Байзақ ауданы әкімінің орынбасары Рүстем Қасымов, Жамбыл ауданы әкімінің орынбасары Мақпал Досымбекова мен Жуалы ауданы әкімінің орынбасары Анар Ахметова балалар қауіпсіздігін қамтамасыз ету бағытындағы жұмыстар жайын баян етті. Сондай-ақ, аталған комиссия отырысында облыстық психологиялық орталықтың директоры Ришат Райф орталық тарапынан атқарылған жұмыстарға тоқталды.
Нұрболат АМАНБЕК