Сөзі мен ісі сай маман
Мұғалім болу тек жаңа сабақты түсіндіріп, ақыл айтумен шектелмесе керек-ті. Жас бала да ауызбен айтқанды емес, іс жүзінде істегенді қайталайды. Осыны ұғынған жас мұғалім Арнат Күзембаев өзі тәрбиелеп жүрген балаларға іс жүзінде үлгі көрсетіп, мектебін көркейтуді қолға алған. Қазақ әдебиетінің жарқын жұлдызы, ұлт болашағына алаңдап өткен Мағжан Жұмабаевтың «Қазақтың тағдыры, келешекте ел болуы да мектебінің қандай негізде құрылуына барып тіреледі. Мектебімізді таза, берік һәм өз жанымызға (қазақ жанына) үйлесетін негізде құра білсек, келешегіміз үшін тайынбай-ақ серттесуге болады» дегенін жанашыр ұстаз Арнат Қайратұлының әрекетінен байқадық.
Бүгінде Тараз қаласындағы №12 Керімбай атындағы мектеп-гимназияда дене шынықтыру пәнінен сабақ беретін Арнат Қайратұлы осы мектептің 2008 жылғы түлегі. Өзін оқытып, тәрбиелеген алтын ұясына қызмет етумен қатар, осы мектептің қажетіне жарауды да мақсат еткен.
Ол оқушыларды дене шынықтыру сабағында шымырлыққа, салауаттылыққа үйрете жүріп, футболдан спортшыларды да дайындайды. Жақында ғана Ұлттық мектеп лигасына 7-8 сынып оқушыларын дайындап апарып, шәкірттері қала чемпионы атанып, облысқа жолдама ұтып алыпты. Қыз балалары да футболдан 3-орынды иеленген.
– Көбінесе оқушыларды футбол жарыстарына дайындаймын. Біздің оқушыларымыз қала, облыс және республика чемпиондары. Осы мектепте өзім де оқушы кезде көптеген спорттық жарыстарға қатысып, әрдайым жүлделі орындар алып жүрдім. Мұғалімдік жолды таңдау барысында әрі қарайғы жетістіктерді оқушыларыммен бірге бағындыруды жөн санап, өзімнің мектебімді биік белестерге көтергім келді. Қазіргі оқушылардың алға ұмтылысы, интеллектуалдық қабілеттері өте жоғары. Мен өзімнің оқушыларымнан болашақ чемпиондарды көремін. Сәтін салып жатса, футболдан ұлттық құрама ойыншылары боларына сенемін және үмітіміз де жоғары, – деген жас маманнан «Сіздің түсінігіңізде нағыз ұстаз деген кім?» деп сұрадық.
Мағжан Жұмабаев сенім артып кеткен жастың бірімен пікірлесіп, «Мектеп көркейсе, болашақ жарқырайды» деп білетін танымына сүйсініп, келер күннен күтер үмітіміз үдей түсті.
Қамар ҚАРАСАЕВА