Ас атасы – нан

Елімізде әлеуметтік маңызы бар тауарлардың бағасы ең арзан әрі төмен қала – Тараз. Солардың бірі – ас атасы нан шаһар дүкендерінде әр бөлкесі 45 теңгеден сатылады. Таразда осыдан 20 жыл бұрын құрылған «Надыров» жеке кәсіпорны наубайханасы нан өнімдерін пісіріп, өткерумен шұғылданады. Мұнда 11 адам жұмыс істейді. Күнделікті 3 мың бөлке нан пісіріледі. Әрқайсысының салмағы – 650 грамм. Олар наубайханаға жақын маңдағы 6 дүкенге өткеріледі. Кәсіпорын жұмысшылары өнім сапасына айрықша көңіл бөледі. Дүкендерге жеткізіп беретін екі автокөлігі бар. Осыдан он жыл бұрын өздерінде ИСО-9001 халықаралық сапа менеджменті жүйесін енгізген.

– Біздің қалалық әкімдікпен меморандумымыз бар. Сондықтан да ұзақ уақыттан бері нан бағасын өсірмей келеміз. Наубайханада пісірілген әр бөлкені дүкендерге 35 теңгеден өткіземіз. Қалған бағаны дүкендегілер қосады. Жұмыс 3 ауысыммен ұйымдастырылған. Наубайшылардың әрқайсысына жұмыстан қайтқан кезде күнделікті 3 мың теңге төленеді және екі бөлке нан беріледі. Келешекте несие алып, жабдықтарды жаңартуды көздеп отырмыз, – дейді «Надыров» жеке кәсіпорнының директоры Рысбек Надыров.

Ақылжан Мамыт, «Ақ жол».

Суреттерді түсірген Ақәділ Рысмахан.

Тараз қаласы.