Ғұламалар ғибратының тағылым ошағы
Тараз қаласында тағы бір білім ошағы пайдалануға беріліп отыр. Бір ерекшелігі, бұл білім ошағына әйгілі шешен Бөлтірік Әлменұлының есімі берілген. Оқу орталығы кәсіпкерлікті дамытудың 2021-2025 жылдарға арналған ұлттық жобасы аясында жеке кәсіпкер Әбілсейіт Тілепбергеновтің бастамасымен және «ForteBank» акционерлік қоғамы Тараз филиалының қаржыландыруымен, «Даму» кәсіпкерлікті дамыту қоры» акционерлік қоғамының қолдауымен жүзеге асып отыр.
Оқу орталығы қазіргі таңда 24 мұғалімді жұмыспен қамтып, 200 баланы қосымша оқумен қамтуда. Алдағы уақытта мұнда қосымша білім алатын оқушылар санын 400 балаға жеткізуге мүмкіндік бар.
Мұнда 23 оқу кабинеті қарастырылған. Ол кабинеттерге еліміздің қоғам қайраткерлері мен дара тұлғаларының есімдері берілген. Бұл да – жаңашылдық. Атап айтқанда, аса көрнекті мемлекет және қоғам қайраткері Дінмұхамед Қонаевтан бастап, аяулы ақындар Нарша Қашағанұлы, Серік Томанов, Бауыржан Үсенов атындағы кабинеттерді көруге болады.
Жас ұрпақты тәрбиелеуде оң ықпалы бар оқу орталығының ашылғанына тараздық тұрғындар өте риза. Аталған мектептің қызметі ұзақ болғай дейміз.
Есет ДОСАЛЫ
Тараз қаласы