Дүйім ел күткен дүбірлі дода
Санаулы күннен кейін Астанада төрткүл дүние көз тіккен Дүниежүзілік көшпелілер ойындары басталады. Апта бойы Арқа төсінде этноспорт Олимпиадасының туы желбіреп, көшпелі халықтардың көшелі өркениеті әлем назарына ұсынылмақ. Бірер күн бұрын Мемлекет басшысы Қасым-Жомарт Тоқаев Париж төрінде өткен ХХХІІІ жазғы Олимпиада ойындарының жүлдегерлерімен кездескені белгілі. Салтанатты жиында төртжылдықтың басты бәсекесінде жүлдеге ие болған әр спортшының бүгінгі жетістігі ертеңгі жеңістеріміздің бастауы екеніне назар аударған Президент елімізде 8-13 қыркүйек аралығында өтетін V Дүниежүзілік көшпелілер ойындарының мəн-маңызына тоқталды.