Қайырымдылықтың қасиеті мол
Қоғамның қозғалысына өз еркіңмен үлес қосу – ізгІ жолдың үлкені. Өзін ғана ойлау әркімнің қолынан келеді, ал қоғамның дамуына ықпал ету – кең ауқымдағы маңызды іс. «Азаматтық қоғам» деген ұғымның анықтамасы жеке тұлғаның және бейресми, мемлекеттік емес қоғамдық ұйымдардың дамуы, жұмысын жолға қоюы. Яғни, көпшіліктің мемлекеттік көмектен тыс қоғамдық қолдауларға ие болуы. Азаматтық қоғам бағытындағы жұмыстар Шу ауданында да жүйелі түрде іске асып келеді.
Осындай азаматтық қоғам бағытына қомақты үлес қосып жүрген ұйымның бірі – Шу ауданындағы «Ерікті аналар. KZ» қайырымдылық қоры. Аталған қайырымдылық қорының төрайымы Гүлнұр Қырбайқызының өзі 6 перзентті өмірге алып келген «Күміс алқа» иегері. Аталған қайырымдылық қоры 2017 жылдан бастап жұмыс істеп, 2021 жылы облыстық әділет департаментіне заңды түрде тіркелген. Қазіргі таңда ерікті аналар мен ерікті студент қыздарды ұйымның жұмысына шақырып, іске асқан жобалары мен нәтижелері көптің көңілінен шығып отыр.
Сонда бұл қайырымдылық қоры немен айналысады, қаржыны қайдан алады деген сауалдар туындауы мүмкін. Кім кімнің де солай ойлауы орынды. Қордың басты мақсаты – көмекке мұқтаж аналарға, ерекше жағдайдағы балалары бар отбасыларға қайырымдылық жасау.
Азаматтық қоғамның дамуы осындай өз еркімен қоғамның дамуына, жекелеген отбасыларға қол ұшын созған ұйымдар арқылы жүзеге асады. Байқап отырғанымыздай, бір ғана «Ерікті аналар» қайырымдылық қоры жүз мыңнан аса тұрғыны бар Шу ауданына үлкен көмек көрсетіп отыр. Өзі отбасында бірнеше бала өсіріп, мынандай қоғамдық ұйымды басқара білу – үлкен жауапкершілік. Мұндай белсенді ұйымдардың көбейгені жақсы. Талайдың алғысын алған аталған қоғамдық қордың жұмысына көмекке мұқтаж отбасылардың баршасы риза. Бұл ұйымның ізгі жұмыстары алдағы уақытта да жалғасын табады.
Есет ДОСАЛЫ
Шу ауданы