Жағалаудағы жарыс
«Таза Қазақстан» республикалық экологиялық акциясы аясында Тараз қаласының «Самал» шағынауданы аумағындағы «Қарасу-2» өзенінің бойында плоггинг ұйымдастырылды. Яғни, акцияға қатысушылар таңғы мезгілде жүгіруден жарыса отырып, жағалаудағы күл-қоқысты жинады.
Өзен бойындағы қоқыстарды жинаумен ұштастырылған жарыс табиғатты қорғаумен қатар, салауатты өмір салтын ұстануды насихаттады.
Плоггингке қала тұрғындары, мәдениет, спорт саласының жастары және «Жасыл Ел-Тараз» мекемесі, үкіметтік емес ұйымдардың мүшелері қатысты. Арнайы радио-концерт ұйымдастырылып, көтеріңкі көңіл күймен спорт және тазалық шаралары қатар жүзеге асырылды.
Ұйымдастырушылар экологиялық акция түрлі форматпен жыл соңына дейін жалғасатынын айтуда.
Қамар РАХМЕТУЛЛИНА