Жаңалықтар

Тұтыншулар құқығы бақылауда

Тұтынушылардың құқықтарын қорғау – қоғамдағы өзекті мәселелердің бірі. Халықты алдау, сапасыз тауарды өткізіп жіберу немесе сатып алынған заттың кепілдік мерзімі аяқталмай бұзылып қалуы, ақшасын қайтармай тұтынушыны әуре-сарсаңға салу – күн сайын кезігіп жүрген жайттар. Мұндай келеңсіздіктерді өңірде сауда және тұтынушылардың құқықтарын қорғау департаменті жүйелейді. Бұл ретте аталған мекеме басшысының орынбасары Байқадам Дүйсенбаев салада 6 айда атқарылған жұмыстар туралы өңірлік коммуникациялар қызметінің алаңындағы брифингте баяндады.

Биыл жыл басынан бері облыс бойынша сауда және тұтынушылардың құқықтарын қорғау департаментіне 528 өтініш келіп түскен. Оның ішінде, тұтынушылардың құқықтарын қорғау саласында 445 өтініш қаралып, бұл өткен жылдың осы кезеңімен салыстырғанда 132 өтінішке көбейіп отыр.

Маманның айтуынша, тұтынушылардың құқықтарын қорғау саласындағы өтініштердің өсімі 42 пайызды құрайды. Сауда және тұтынушылардың құқығын қорғау департаменті аймақтағы әлеуметтік маңызы бар азық-түлік тауарларының бағасын тұрақтандыру бойынша заңсыз бағаны көтеру фактілерімен күресу жұмыстарын жүйелі атқарып келеді.

Мәселен, сауда қызметі саласында департаментке 83 жазбаша өтініш түскен. Мұндай жазбаша өтініштердің жалпы саны 297, мамандар 54 азаматты қабылдаса, департамент басшысы екі адамды жеке қабылдаған. Сенім телефонына 164, телегроммботқа 11 өтініш түскен.

Өткен 6 айда департамент өкілдері тұтынушылардың өтініштері бойынша бизнес субъектілеріне жоспардан тыс 68 тексеру жүргізген. Тексеру нәтижесінде 58 заң бұзушылық анықталған. 45 ұйғарым енгізіліп, құқық бұзушыларға ескерту түрінде 44 әкімшілік жаза және жалпы сомасы 544 570 теңгеге айыппұл түрінде 7 жаза қолданылған. Сонымен қатар, 7 субъектіге 1 576 484 теңге шамасында айыппұл салынып, тұтынушылардың құқықтарын қорғау саласындағы 4 тексеріс тараптардың келісімімен аяқталған.

 

Арайлы ЖАҚСЫЛЫҚ