Махаббат пен батырлықтың жаршысы
Қолына қалам ұстаған талант иелерінің ішінде осалы жоқ. Бәрі де өз әлемінің шеберлері. Дегенмен, шын мықты, аса дарын иелері бөлек. Солардың бірі және бірегейі – белгілі халық жазушысы, Мемлекеттік сыйлықтың лауреаты Әзілхан Нұршайықов.
Жазушының нағыз шығармашылық шеберлігі туралы Тараз қалалық орталықтандырылған Абай кітапханасында Әзілхан Нұршайықовты еске алуға арналған «Ерлік пен махаббат» атты әдеби кеште кеңінен айтылды. Әуелі сөз алған М.Х.Дулати атындағы Тараз өңірлік университетінің профессоры, филология ғылымдарының докторы Сәмен Құлбарақ әйгілі жазушының «Махаббат қызық, мол жылдар» романын талдап, қызықты әңгімелеп берді. Романдағы басты кейіпкер Ербол автордың өзі екенін айта келіп, Меңтай образына кеңінен тоқталды. Сонымен қатар, «Ақиқат пен аңыз» романына, оның кейіпкері Бауыржанның болмысын, сол болмысты аша білген Әзілхан Нұршайықовтың шеберлігіне ерекше назар аударды.
Мұнан соң сөз алған Тараз қалалық ардагерлер кеңесі ұйымдастыру бөлімінің меңгерушісі Алдаберді Мақашев әдеби кітаптың адамға берер әсері, тіпті тағдырыңа ықпалы болатынына тоқталды. Оқушы күнінде жазушы Қабдеш Жұмаділовті оқып, оның кейіпкерлері секілді өзі ұнатып жүрген қызға ғашық екенін айта алғанын, аяғы махаббатқа ұласқанын айтты. Қазір сол өзі ғашық болған жаннан 7 перзент сүйіп отырғанын айтқанда оқырмандар ризашылықпен қол соқты. Іс-шара барысында Тараз қаласындағы №39 И.Панфилов атындағы мектеп-гимназиясының қазақ тілі мен әдебиеті пәнінің мұғалімі Күләш Мұхаметқайырова кітаптың көл көсір пайдасы, рухани қазына екеніне тоқталып, студент күнінен осы кітапхананың тұрақты оқырманы екенін жеткізді.
Ат алған кіт апхана қызметкерлері Әзілхан Нұршайықовтың рухани әлемінен кітап көрмесін ұйымдастырды. Іс-шараны кітапхана директоры Ұлбо сын Сәулебаева қорытындылап, әс ерлі әңгімелерімен бөліскен қонақтарға алғысын білдірді.
Есет ДОСАЛЫ
Тараз қаласы