Сөз – тасқа басылған тарих

Сөзде жан бар, сөзде рух бар. Бабатаным әр сөздің киесі болатынын ұқтырады. Сөз – тарихи құжат, негіз, тасқа басылған таңба. Киелі көне кітаптарда да «Ең әуелі сөз болған...» делінеді. Қолына қалам ұстаған жанның серті де, дерті де сөз. Ұлттың ұлы тілі сөз ұстаған қауымның қалам қасиеті арқылы ары қарай дамиды, өмірлікке өркен жаяды. Бұған дейін қазақтың басынан қандай қасірет өткені тарихтан белгілі. Сол кезде де сөз өлген жоқ. Тәуелсіздік алған кезеңнен кейін де төл тілімізді тұғырына қондыруға ақын, жазушы, ғалымдар, жалпы зиялы қауым өлшеусіз үлес қосты. Әрине, олардың қатарында журналистер де бар.