Бетқайнар колледжінде жаңа цех іске қосылды

«Жас маман» жобасы аясында жүзеге асқан цехтың жұмыс қарқыны тоқыма фабрикасынан кем емес. Жетпіс адамды тұрақты жұмыс орнымен қамтуға қауқары бар цехтың техникалық базасы - өндірістің өріс алуына үлкен сеп. Мұнда тек киім-кешек қана емес, табиғи өнімнен шикізат өндіру де жолға қойылған. Мәселен, қой жүнінен киіз басып, көрпе-төсекке қажетті өнім дайындалады. Осылайша қыздың жиған жүгіндей, тәп-тәуір дүниелер пайда болады. Жалпы «Жас маман» жобасы сонау жастар жылы қолға алынған болатын. Бұл жоба «Жастар – ел тірегі» ұлттық жобасының құрамына кіреді. Аталған жоба сұранысқа ие өнеркәсіптік және сервистік 100 мамандық бойынша 180 кол­ледж бен 20 ЖОО-ын жаңғыртуды және білікті мамандарды даярлауда ха­лықаралық тәжірибені енгізуді мақсат еткен еді. Цехтың жүйелі жұмысы туралы газетіміздің алдағы санында өндірісі өріс алған өлкеде іссапармен жүрген әріптесіміз, журналист Қамар Қарасаеваның көлемді мақаласынан оқи аласыздар.