200 ҚАЗАҚ АЙДАН ЖЕР АЛЫПТЫ

олардың арасында Тараз қаласының тұрғыны да бар

YK-news.kz. сайтының хабарлауынша, 200 қазақстан­дық Ай мен Марстан жер сатып алыпты. Әдеттен тыс іспен айналысатын кеңсе өзі туралы өткен жылдың басында паш еткен. Содан бері 200 жер телімі сатылған. Ай бетіндегі жерге деген сұраныс Алматы, Шымкент, Тараз және Астана қалаларынан көбірек түсіп жатқан көрінеді. – Мұндай дерек пен дәйек аталған қала тұрғындарының көптігі мен менталитетіне және басқа өңірлерге қарағанда заман көшінен қалмағандықтарын көрсетеді, – дейді еліміздегі америкалық «Ай елшілігі» өкілдігінің бірінші хатшысы Тасболат Қамбаров. Бір қызығы, Ай мен Марстан жер сатып алған адамға оның «көк қағазымен» бірге, сол жақтың ағылшын тілінде жазылған Ата заңы да табыс етіледі. Бүгінде жер шарының 180 елінен төрт миллион адам Ай мен Марстан жер алып үлгеріпті. Олардың арасында Джордж Лукас, Мик Джаггер, Джон Траволта, Том Круз, Николь Кидман, Клинт Иствуд, Арнольд Шварцнеггер, Роналдо және басқалар бар екен. Ұйымның арнайы сайтында бастама иесі американдық Днеис Хоуп екені айтылған.

«Ақ жол-Ақпарат».