Ата-анаңды құрметте!..

Қазір адамдардың бойындағы өзгеріске деген құштарлық көңіл қуантады. Мәселенің бар екенін ұғынып, оны шешуге әрекет жасайды. Қазір дәуір басқа, таным басқа, сәйкесінше түсінік те өзгерген. Кез келген әлеуметтік желідегі психолог, коучингтер құдды бәріне бір сөзді жаттатып қойғандай, мысал келтіре бір сөзді айтады. «Бай болғың келсе, әкеңмен қарым-қатынасты түзе, бақытты болуың – анаңа байланысты» дейді сала мамандары. Бұл қаншалықты рас, кейде байыбына бармай, жасөспірімдерде іштей ата-анаға деген ашу-ыза болады. «Мен бақытты емеспін, маған анамның көңілі толмайды. Менің ақшамен мәселем көп, өйткені мені әкем жақсы көрмейді». Бұл ойды салып берген желідегі желдей ескен маман-сымақтардың пікірі. Ақ пен қараны ажыратып беру менің құзырымдағы міндетке жатпайды. Бірақ, дәл осы сөз кей адамға әсерін беріп те жатыр. Нәтиженің жақсысы да, көңілге қаяу салатыны да бар. Жөн-жосығын түсінбеген жасты да кінәлай алмаймыз. Оның болмысы сондай. Мұны біз айтып отырған психологтар жақсы біледі. Ендеше мамандар арнайы осы тектес бейнематериалдарды, семинар-тренингтерді жарияламас бұрын, белгілі бір шектеу қою керек шығар. Тұлғалық дамуда жас айырмашылықтың аса қатты рөл ойнайтынын біз жақсы білеміз. Білім ордасында ұстаздық еткендіктен, әр баланың болмысына жауапкершілікпен қараймыз. Оның болашағы кейде, ата-аналардан қарағанда осы оқытушыларға уайым. Әлеуметтің бәрі қазір осы әлеуметтік желілерге телміріп отырғанда біздің жастар үлгіні тек техникадан алатындай көрінеді. Талап сондай болғанымен, махаббатсыз болған ілім, сабақ, жол сілтеу ғұмырсыз екені аян. Жалпы, бақытты өмір сүрудің еш қиындығы жоқ. Адам өмірге келгендегі негізгі миссиясын ұмытпағаны абзал. Әр адамда жоспарлы түрде армандары болады. Оған жету тек өз қолыңда. Бала күнгі травмалар, реніштер уақыт өте келе ұмытылады. Ол сенің жолыңды байлайтын қақпан емес. Жақында ғана белгілі әнші Айгүл Иманбаеваның сұхбатын тамашаладым. «Ең үлкен тас әкем болды» деген тақырыптың өзінен бұл не қылған оқиға деп, үңіле кетесің. Тыңдадым, сонда кездесетін бір мінез баршамызда бар. Көкіректі кеңге салу, үлкенге құрмет көрсетпеу, сөзін тыңдамау. Осының барлығы жинала келіп, әкеге емес, балаға салмақ болады. Кез келген жаратылыс өзінің орнын білсе, бақыттың кілтін тапқаны. Баланың мінезі анаға аян болса, қолынан іс келер-келмесі әкенің ой-таразысына байланысты нәрсе. Сондықтан, әкенің бойындағы киені қадірлей білгенде ғана сенің арманыңа жол ашылады. Бұл тұжырым біздің менталитетке де сай келеді. Мысалы, «Әкесі бардың ырысы бар», «Жақсы әке жаман балаға, қырық жыл азық», «Бір әкенің тәрбиесін жүз мектеп те бере алмайды...» осы сынды нақыл сөздерді оқығанда дана халық алдында бас иесің. P.S. Адам миллиондаған жасушадан құралатыны сияқты мемлекет те миллиондаған отбасыдан құралады. Егер де жасушасы сау адам – тыныш, ауырып-сырқамай өмір сүрсе, отбасылары тәлімді елде ешқандай бүлік-тартысқа ұрынбай, бейбіт өмір сүреді. Ондай мемлекетте қорқыныш, үрей аз болады. Бейбіт күннің бастауы – бақытты отбасында. Шаңырақ шаттыққа толы болсын десеңіз – ата-ананы құрметтейік!  

 Айша КАДИРИМБЕТОВА,

М.Х.Дулати атындағы Тараз өңірлік университетінің «Техникалық физика» кафедрасының аға оқытушысы, магистр, «Ақпараттық технологиялар» факультетінің тәрбие-ісі жөніндегі декан орынбасары.