Еңбек қауіпсіздігі – басты назарда
Еңбек қауіпсіздігі – басты назарда
– Кәсіподақтар міндетін толық атқара білуі үшін жергілікті атқарушы органдармен және жұмыс берушілермен қарым-қатынас жасап, салиқалы диалог құра білу қажет. Әлеуметтік еңбек қарым- қатынастарды келісімге сәйкес тиімді жүргізіп, еңбеккерлерге әлеуметтік қолдау көрсетілуі керек. Еңбек шарты мен ұжымдық шарттың қатаң сақталуы, жалпы еңбек адамының лайықты тұрмыс сапасы мен жағдайын жасауға мүдделілік таныту өте маңызды міндет әрі қажетті талап болуға тиіс, – деді аймақ басшысы Нұржан Молдиярұлы. Жалпы, еңбек қатынастары саласында қоғамдық-саяси ахуалдың қалыптасуы жалақылардың уақтылы берілмеуі мен төмен болуына байланысты орын алып отыр. Жыл басынан бері кәсіпорындарда 15 жазатайым оқиға орын алып, 17 адам зардап шеккен, 1 адам қайтыс болған. «Жазатайым оқиғалар бойынша мемлекеттік еңбек инспекторлары басқаратын комиссиялар арнайы тергеп-тексеру жұмыстарын жүргізіп, материалдарының көшірмесін ішкі істер органына жолдады. Биыл облыстың 635 кәсіпорны 18 511 жұмыскердің жалақысын орта есеппен 18 пайызға көтерді. Жыл басынан бері 6 кәсіпорында 394,1 миллион теңгенің жалақы қарыздары анықталып, олар толығымен жойылды. Осының нәтижесінде 290 жұмыскердің еңбек құқықтары қорғалды», – деді облыстық еңбек инспекциясы басқармасының басшысы Жарылқасын Айтақов. Жиын соңында аймақ басшысы тиісті басқармалар мен облыстық кәсіподақтар бірлестігіне нақты тапсырмалар берді.
Гүлжан РАХМАН