Тараз төрінде «Сен жеңімпазсың!» атты жеңіл атлетикалық марофон өтті. Облыс әкімдігі спорт басқармасы мен «Жамбыл марофон» бірлестігі ұйымдастырған шараға Түркістан, Қостанай облыстарынан және Алматы, Шымкент, Талдықорған, Тараз қалаларынан 700-ден астам адам қатысты. Оның ішінде, 160 қатысушы 6-12 жастағы жасөспірімдер. 500 метр қашықтық сайысында шымкенттік желаяқ Ақназар Рәтбек топ жарып, мәре сызығынан алғашқы боп өтті.
— Ұлым – Ақназар 500 метр қашықтық сайысында бірінші орынға ие болды. Бұл 10 жасар баламның спорттағы алғашқы жеңісі. Үш жылдан бері жүзумен айналысатын ұлым бүгінде Шымкент қаласындағы №23 мектеп-лицеяде 6-сынып оқушысы. Жалпы, мұндай жарыстарға өзім де жиі қатысамын. Бұған дейін, Шымкентте, Түркістанда қаласында өткен марофондарға қатыстым. Сол сәттерде ұлымды қасымнан бір сәт тастаған емеспін. Ал енді Таразда өткен жарыста алғаш рет додаға қостым. Осылайша, өз қатарластарынан оқ бойы озық шығып, жеңімпаз атанып отыр. Ұлымның бұл жеңісі оған сенім сыйлады. Алдағы уақытта бұдан биік белестерді бағындырады деп сенемін, — дейді әкесі Санат.
Айта кетейік, марофонға қатысушыларға дипломдар мен қаржылай сыйақылар табыс етілді. «Қазфосфат» ЖШС, Тараз металлургия зауыты және «Dveri city» компаниясы демеушілік жасаған жарыстың жалпы жүлде қоры – 1 миллион 760 мың теңге.
«Aq jol»-akparat
Comments are closed.