Соның арқасында туғанына небәрі 16 күн болған нәресте емделіп шықты
Ерте туа біткен кардит ерте кезеңде (жүктіліктің 4-7-айында) ұрықтың жүрегіне вирустардың, бактериялардың, сәулеленудің және тағы басқалар әсер етуі нәтижесінде пайда болады.
Дәнекер тін талшықтары енетін жүрек мембраналарының қалыпты құрылымы мұндай жағдайда бұзылады. Бұл процесс эндокардтан басталады. Содан кейін миокард та зақымдалады. Бала әдетте кардит, жүректің жиырылу функциясының бұзылуы және оның қуыстарының кеңеюі нәтижесінде туады.
Жетекші клиникалық белгілерге кардиомегалия, жүрек жеткіліксіздігі (алдымен сол жақ қарыншалық, содан кейін жалпы), ентігу, жөтел жатады.
Қарап тексергенде тері жабындыларының бозаруы, көрінетін шырышты қабаттарының орташа цианозы, саусақ ұштары мен мұрын- ерін үшбұрышының цианозы, жұмсақ тіндердің пастоздылығы анықталады.
Туа біткен кардитті диагностикалау көптеген жағдайларда қиын және ол көбінесе клиникалық деректерге және аспаптық зерттеу нәтижелеріне байланысты. Туа біткен кардиттің екі нұсқасында да жүрек патологиясының алғашқы белгілері өмірдің алғашқы 6 айында (2 немесе 3-жылы сирек) пайда болады.
Балаларды кешенді тексеруде диагнозды растау үшін зертханалық, аспаптық және патоморфологиялық диагностикалық әдістер, электрокардиография, кеуде қуысының рентгенографиясы қолданылады.
Эхокардиография – туа біткен кардитті тексерудің міндетті әдісі. Ерте туа біткен кардит кезінде зертханалық қан көрсеткіштері қалыпты болуы мүмкін. Бұл – тәжірибеден алынған жағдай. Қазан айының басында Қордай аудандық орталық ауруханасынан медициналық авиация желісі арқылы облыстық көпсалалы балалар ауруханасына 16 күндік жаңа туған нәресте жеткізілді. Түскен кезде ентігу, дене қызуының 35 градусқа дейін төмендеуі, регургитация, жөтел, аяқ-қолдардың салқындауы, ісіну, енжарлық, тері жамылғысының бозаруы, сүт безі жұмысының тоқтауы сынды шағымдары болды.
Анасының айтуы бойынша, туғаннан бастап ентігу, аяқ- қолдарының салқындығы байқалған. Баланың жағдайы 1 қазан күні жоғарыда аталған денсаулық шағымдары пайда болған кезде нашарлапты. Жөтел осы белгілерден бір күн бұрын байқалып, кішкентай науқас Қордай аудандық ауруханасына жатқызылды. Жалпы клиникалық талдаулардың нәтижелері патологияны анықтаған жоқ, бірақ кеуде қуысының рентгенографиясында жүрек көлемінің ұлғаюы анықталды.
Жағдайының ауырлығын ескере отырып, нәресте 3-деңгейлі облыстық көпсалалы балалар ауруханасына одан әрі тексеру және емдеу үшін әуе көлігімен реаниматологтың сүйемелдеуімен, жасанды тыныс алу аппаратымен облыс орталығына жеткізілді. Ол шұғыл түрде соматикалық корпустың жансақтау бөліміне жатқызылды.
Түскен кезде нәресте тыныс алу жеткіліксіздігі, жүрек-тамыр жеткіліксіздігі, интоксикация белгілері және зат алмасуының бұзылуы салдарынан өте ауыр жағдайда болды. Қарау кезінде тері жабындылары бозғылт, сұрғылт түсті болып, тері өрнектері мәрмәр тектес көрінді. Сонымен қатар периоральды цианоз анықталды. Бас терісінде жылжымалы ісінулер, аяқ-қолдарында склерема пайда болған. Тыныс алуы жылдам, кеуденің төменгі бөліктерінде кері тартылу да бар. Жөтелі сирей түскен. Өкпе аускультациясында тынысы екі жақтан әлсіреген, ылғалды сырылдары бар. Жүрек қағысы жиілеген және соғысы тұйық, шусыз.
ЭКГ диагностикасы барысында электрлік белсенділіктің төмендеуі, қарыншалардың реполяризациясының бұзылуы, қарыншаларда гипертрофия белгілері байқалды. Кеуде клеткасының қарапайым рентгенографиясында сол жақ өкпенің төменгі бөлігінде өкпе тінінің ошақты инфильтрациясы анықталды. Синустары бос. Жүректің сол жақ қарыншасының гипертрофиясы да қалыптасқан. Баланы қарап, тексерген кардиолог оған «гидроперикардты туа біткен кардит, ФК 2А жүрек жеткіліксіздігі» диагнозын қойды.
Шұғыл түрде жансақтау бөлімінің меңгерушісі Қуандық Әміреқұлов, кардио-ревматология бөлімінің меңгерушісі Ирина Ли және емдеуші дәрігер Шынар Хамбарова Педиатрия және балалар хирургиясы ғылыми орталығының (Алматы) медицина ғылымдарының докторы Валентина Ишоуовамен телемедицина арқылы консультация өткізіп, нәтижесінде туа біткен кеш кардит диагнозы расталды. Науқасты емдеу жолдарына аздаған өзгерістер енгізілді.
Кешенді түрде қолға алынған терапияның арқасында бар болғаны бір ай ішінде емделіп, қанағаттанарлық жағдайда үйіне шығарылды. Енді ол ары қарай Астана қаласындағы Ұлттық ғылыми кардиохирургиялық орталығында емделу үшін порталдық рәсімдеуден өтті.
Осылайша дер кезінде анықталған аурудан баласын емдеп шығарған дәрі- герлерге ата-анасының алғысы шексіз.
Облыс әкімдігі денсаулық сақтау басқармасының баспасөз қызметі.
Comments are closed.