«Оңтүстік» өңірлік қолбасшылығының химик-жауынгері, аға сержант Әлібек Момбековтің «Әскери тарланы» армиялық байқауының «Радиациялық-химиялық және биологиялық қорғаныс әскерлерінің үздік маманы» аталымы бойынша жеңіске жетуіне толық мүмкіндігі бар. Бұл байқау жыл сайын өткізіліп, әртүрлі аталымдар бойынша жеңімпаздардың жаңа есімдері жарияланады. Сәтін салса байқауда бағы жанып, Әлібек өз атын ғана емес, өз батальоны мен «Оңтүстік» өңірлік қолбасшылығының абыройын асқақтатып, жеңімпаздар қатарынан көрінуге ниетті.
Аға сержант Әлібек Момбеков радиациялық-химиялық және биологиялық қорғаныс әскерлерінің жан-жақты дайындалған, білікті маманы ретінде биыл екі мәрте еленді. Алғаш рет оның тамаша дайындығы биыл көктемде Қазақстанда өткен «Батыл тойтарыс-2022» ведомствоаралық командалық-штабтық оқу-жаттығуында байқалды.
Екінші рет ол «Айбалта-2022» стратегиялық командалық-штабтық оқу-жаттығуларында ерекше көзге түсті. Мұнда ол «Өзара әрекеттесу», «Эшелон» және «Поиск» халықаралық оқу-жаттығулары барысында қырағылық танытқан болатын.
Аға сержант Әлібек Момбековтің жұмысқа деген ұқыптылығы мен кәсіби көзқарасын оның әскери бөлім командирі де, қолбасшылық өкілдері де айрықша бағалауда.
Оқу-жаттығулар барысында Әлібек Момбеков өзінің батальондағы жауынгер жолдастарымен бірге шартты түрде ластанған аумаққа радиациялық-химиялық барлау жүргізді, радиохимиялық және биологиялық бақылау бекеттерін құрды, сондай-ақ химиялық шабуылға ұшыраған әскери нысандарды дезинфекциялады.
Қызмет ерекшелігін білу, радиациялық-химиялық және биологиялық барлау взводы сержантының жұмыс процесін ұйымдастыра білуі, берілген тапсырмаларды белгіленген мерзімде абыроймен атқаруы батальонға жүктелген жалпы міндеттердің орындалуын қамтамасыз етті. Оқу-жаттығулардың сәтті өтуі әрбір әскери бөлімге, қызметке ғана емес, әрбір әскери қызметшіге тікелей байланысты. Аға сержант Ә.Момбеков тапсырмаларын мүлтіксіз орындады. Нәтижесінде «Оңтүстік» өңірлік қолбасшылығына қарасты радиохимиялық және биологиялық қорғаныс батальонының жауынгерлері үздіктер қатарынан көрінді.
– Қазір мен өзімді басқа қызметте елестетпеймін, тек радиохимиялық және биологиялық қорғаныс бөлімшесінде көремін. Мен тіпті түсімде де жігіттермен бірге химиялық барлау жабдықтарын орналастырып жүрген сәттерді жиі көремін. Химиялық және биологиялық қауіптер туралы, олардың алдын алу және зардаптарын жою жолдары туралы баяндайтын көркем және деректі фильмдерді үлкен қызығушылықпен қараймын, – дейді алғыр жауынгер Әлібек Момбеков.
Ең қызығы, мектепте химия пәні Әлібекке ұнамапты. Ол математикаға көбірек бейім болған. Сондықтан да Байзақ ауданындағы туған мектебінің тоғызыншы сыныбын бітірген соң, Жамбыл политехникалық жоғары колледжіне қаржыгер мамандығы бойынша оқуға түседі. Алайда оның қаржыгер болу мүмкіндігі болмады. Колледжді бітіргеннен кейін бірден әскерге шақыру қағазы келіп, 2010 жылдың күзінде Шекара қызметіне аттанды. Қызмет үйден шалғайда – Ақтау қаласында өтті, бұл оның ата-анасыз, алыс қашықтыққа жасаған алғашқы тәуелсіз сапары және әскери салаға алғаш рет енуі болды.
– Маған әскери өмір ұнады, тәртіп, бәрі анық және нақты, сен өз міндетіңді білесің, мақсатты көресің, кедергіні көрмейсің. Сол кездің өзінде өмірімді әскери қызметпен байланыстыру керек пе деп қатты ойладым. Ақыры ойым шындыққа айналды, – дейді өзі.
Әлібек кіші сержант шенімен елге оралып, бір жыл бойы туған ауылында лайықты жұмыс таба алмаған соң күшейе түсті. Бір жылдан кейін ол Таразда «Оңтүстік» өңірлік қолбасшылығының құрамында химиялық-биологиялық барлау батальоны құрылып, оған мамандар тартылып жатқанын білді. Алғашында Әлібек әскери бөлімге қызметкер болып жұмысқа орналасты. Бір жылдан кейін сол бөлімшеде келісімшарт бойынша әскери қызметке шақырылды.
Сержант Ә.Момбеков үш жыл материалдық-техникалық қамтамасыз ету взводының машинисті болып қызмет етті. Осы уақыт ішінде ол химиялық бөлімшеде қызмет етудің қыр-сырына қанық болды. Құлшынысы қуанышқа ұласқан ол аэрозольдік шабуылдарға қарсы рота отрядының командирі болып тағайындалып, «ARMI-2016» халықаралық армия ойындары аясындағы «Қауіпсіз орта» жарысына қатысу үшін Қазақстан Қарулы Күштері командасына қосылды. Жарыс Ресей Федерациясының аумағында Кострома қаласында өтті.
Сол жылы Қазақстан құрамасы жалпы командалық есепте үшінші орынды иеленді. «Үздік экипаж» номинациясында Әлібек Момбековтің экипажы жеңіске жетті.
Жарыс аяқталып, әскери қызмет жалғасты. Әлібек химиялық қорғаныс батальонында түрлі қызметтер атқарып, оқу-жаттығуларға қатысып, кәсіби шеберлігін шыңдады. Радиациялық-химиялық және биологиялық қорғаныс ротасы взводының сержанты лауазымына тағайындалуымен Әлібек Момбековке аға сержант әскери атағы берілді.
«Біздің взводтың сержанты Әлібек Момбеков – нағыз еңбекқор. Ол бірде-бір жаттығуды жіберген жоқ, барлық қызметтік міндеттерін ықыласпен орындайды, батальон өміріне белсенді қатысады. Қызметке әбден сіңісіп кеткені сонша, жасы отызға келсе де үйленуге асықпады. Ал осы жылдың қаңтар айында ол бізге махаббатын тапқанын, той болатынын айтқан кезде қатты қуандық», дейді радиохимиялық және биологиялық қорғаныс ротасының командирі, лейтенант Қайрат Қазаев.
Әлібек Момбековтің таңдаулысы – Бекзада оның үйлену туралы ұсынысын еш ойланбастан қабылдапты. Оның айтуынша, әскери қызметшілер оған әрқашан сенім ұялататын, олардың әскери киіміне тәнті болған, оның берік сенімі бойынша әскерилер өте жауапты адамдар. Ақыры солдаттың жары болсам деген қыздың арманы, Әлібектің ұлды болсам деген арманы орындалды. Олардың тұңғыштары Әлихан да болашақта әке жолын жалғастырып, Отанына адал қызмет етеріне күмәніміз жоқ.
Аға сержант Ә.Момбековтің биыл Қарулы Күштер қатарындағы 10 жылдық еңбегі еленіп, «Мінсіз қызмет үшін» атты алғашқы мерейтойлық медалін алды. Әлібектің қазіргі келісімшарты 2025 жылға дейін жасалған, бірақ қазірдің өзінде ол оны ұзартатынын ашық айтуда.
– Әскери қызметімді басқа салаға ауыстыру ойымда жоқ. Он жыл бойы мен әскери мамандыққа берілгендігім сонша, сала менің өміріме айналды, сондықтан мен үшін жұмысты ауыстыру өзіме, армандарыма және жоспарларыма опасыздық жасағанмен бірдей. Оның үстіне осы жылдар ішінде мен әскерде көптеген достар таптым, оларсыз өмір сүре алмаймын. Әскер – менің тағдырым. Ал мен соның бір бөлшегі болып, Отанға қызмет етіп, пайдамды тигізгім келеді. «Радиациялық-химиялық және биологиялық қорғаныс әскерлерінің үздік маманы» аталымына ие болуым командирлерімнің маған деген үлкен сенімі. Мен бұл сенімді ақтық демім қалғанша абыроймен ақтауға тырысамын, – дейді Әлібек Момбеков.
Жауынгердің ерік-жігері, таудай талпынысы замандастарымен қатар, ізін басып келе жатқан өскелең ұрпаққа да өнеге боларына сенім мол.
Нұржан ҚАДІРӘЛІ.
Comments are closed.