Қазақстанда маймыл шешегін жұқтырған бірде-бір науқас анықталмады – министрлік

25

Бас санитар дәрігер қазақстандықтарға Батыс Африка елдеріне бармауға кеңес берді.

Қазақстанда маймыл шешегін жұқтырған бірде-бір науқас тіркелмеді, деп хабарлады денсаулық сақтау министрлігі.

Мемлекеттік шекара арқылы елге кіретін барлық адам санитарлық-карантиндік бақылаудан өтіп жатыр.

«Аса қауіпті ауруларды жұқтырды деген күдікке ілінген науқасты мемлекеттік шекарада қашықтықтан термометрия арқылы анықтау іс-шаралары жүргізілуде», — деп атап өтті бас санитар дәрігер — денсаулық сақтау вице-министрі Айжан Есмағамбетова.

Маймыл шешегінің белгілері қандай

Маймыл шешегі (monkeypoxes – MPXV) – сирек кездесетін жұқпалы ауру.

Инкубациялық кезең – 5-тен 21 күнге дейін созылады. Симптомдары: дене қызуының көтерілуі, дененің ауыруы, әлсіздік, бөртпе, құсу, лимфа түйіндерінің ұлғаюы, бас айналу.

Аурудың ұзақтығы 2-3 апта, өздігінен емделуге бейім.

Маймыл шешек ауруының негізгі көзі жабайы жануарлар: приматтар мен кеміргіштер (тиіндер).

Инфекция науқастың қаны немесе оның биологиялық сұйықтықтары арқылы, сондай-ақ ауру жануардың еті арқылы да жұғуы мүмкін.

Маймыл шешегі бүгінде Батыс Африка елдерінде кең таралған (Конго Демократиялық Республикасы, Конго Республикасы, Камерун, Орталық Африка Республикасы, Нигерия, Кот-д ‘ Ивуар, Либерия, Сьерра-Леоне, Габон және Оңтүстік Судан). Африкада 2016 жылдан бастап, ресми ақпарат көздеріне сәйкес, ауру 20 есе өсті.

ДДҰ-ның алдын ала мәліметі бойынша, Африка құрлығынан тыс әлемнің 14 елінде (Испания, Португалия, Ұлыбритания, Бельгия, Канада , Германия, Италия, Австралия, Нидерланды, АҚШ , Израиль, Франция, Швейцария , Швеция) 110 жағдай тіркелген.

Бас санитар дәрігер жазғы демалыс және демалыс маусымының басталуына байланысты шет елдерге шығатындар үшін мынадай ұсыныстар береді:

  • маймыл шешегі өршіген Батыс Африка елдеріне (Конго Демократиялық Республикасы, Конго Республикасы, Камерун, Орталық Африка Республикасы, Нигерия, Кот-д ‘ Ивуар, Либерия, Сьерра-Леоне, Габон және Оңтүстік Судан) барудан аулақ болыңыз (әсіресе балалармен);

 

  • шет елге шыққан жағдайда жабайы жануарлармен (приматтармен, кеміргіштермен) байланыс орнатпау, стихиялық және көше саудасы орындарында тамақ ішуден аулақ болу, тамаққа тек термикалық өңделген етті (азық-түлікті) мұқият пайдалану;

 

  • адамдар көп жиналатын орындарға барған кезде жеке профилактика (қашықтық, маскалар, антисептиктер) шараларын пайдаланыңыз, қол гигиенасын сақтаңыз.

 

  • егер сапардан оралғаннан кейін 3 апта ішінде мазасыздық, қызба, бөртпе (қызару, көпіршіктер және т.б.) сезінсеңіз – шетелде болғаныңыз туралы міндетті түрде хабарлай отырып, жақын маңдағы медициналық ұйымға дереу жүгініңіз

Comments are closed.