Министр шаруаларды мазалаған мәселелерге назар аударды

2

Облысымызға жұмыс сапары барысында Қазақстан Республикасының Ауыл шаруашылығы министрі Ербол Қарашөкеев облыс әкімі Нұржан Нұржігітовпен бірге өңірдегі шаруалармен кездесті.

Министр облыста ауыл шаруашылығы саласының табысты дамып келе жатқанын айтып, бүгінгі таңда көктемгі дала жұмыстарын уақтылы әрі сапалы жүргізу – басты міндеттердің бірі екендігін жеткізді.

– Ауыл шаруашылығы тауарларын өндірушілер тұқымдармен қамтамасыз етілді. Минералды тыңайтқыштарды сатып алу бойынша жүйелі жұмыстар жүргізілуде. Жамбыл облысында ауыл шаруашылығы дақылдары 760 мың гектар жерге егіледі, бұл өткен жылмен салыстырғанда тоғыз мың гектарға артық. Мен өзім бірқатар ауданды аралап, жергілікті жерлердегі жағдайлармен таныстым, шаруалармен бірге өзекті мәселелерді талқыладық, – деді Ербол Қарашөкеев.

л ел Үкіметі мен ауыл шаруашылығы министрлігі бекіткен агросекторды қолдау, инвестициялық жобаларды іске асыру бойынша қабылданып жатқан шаралар туралы баяндады. Ауыл шаруашылығы министрі 2023 жылдан бастап агроөнеркәсіптік кешенді субсидиялаудың жаңа тетігі енгізілетінін хабарлады.

Президенттің тапсырмасына сәйкес ауыл шаруашылығын дамытуға қомақты қаражат бөлінуде. Биыл мемлекет тарапынан 310 миллиард теңге субсидия қаралды. Агроөнеркәсіп кешенін дамытуға қосымша 298 миллиард теңгеден астам қаржы бөлінеді, – деді Ербол Қарашөкеев.
Кездесу ашық диалог форматында өтті. Шаруалар агроөнеркәсіп кешенін дамыту, оның ішінде мал шаруашылығы мен ауыл шаруашылығы кооперативтерін қолдау, жайылымдық жерлерді бөлу, ауыл шаруашылығы жерлерін суару, субсидия алу, ветеринарлық қауіпсіздікке қатысты сұрақтарын жолдап, жауаптар алды.
Сондай-ақ кездесуге Қазақстан Республикасы Ауыл шаруашылығы министрлігінің бірқатар департамент басшылары қатысты. Олардың қатарында егіншілік департаментінің директоры Азат Сұлтанов, Аграрлық азық-түлік нарығы және ауыл шаруашылығы өнімдерін қайта өңдеу департаментінің директоры Назгүл Хатепова, жер ресурстарын басқару комитеті төрағасының орынбасары Гүлжахан Бимендина, Мал шаруашылығы департаменті директорының орынбасары Ерлан Ілиясов, «Бәйтерек» ҰБХ» АҚ басқарушы директоры Айгүл Жұбанышева, «ҚазАгроҚаржы» АҚ басқарма төрағасы Айдар Прашев бар.
– Мемлекет жыл сайын ауыл шаруашылығы саласын қолдау шараларын арттырып келеді. Бүгінгі жиынның нәтижесінде көптеген өзекті мәселелер шешімін табатынына сенімдімін. Біздің басты мақсатымыз – еліміздің азық-түлік қауіпсіздігін қамтамасыз ету, – деп түйіндеді сөзін аймақ басшысы.

Облыс әкімінің баспасөз қызметі.

Comments are closed.