Кеңес одағы құлап, тәуелсіздігімізді алғаннан соң еліміз басқа мемлекеттермен мәдени, саяси, экономикалық т.б. салаларда өзара ынтымақтастық орната бастады. Осының негізінде Қазақстан азаматтары шетелдік діни оқу орындарына барып, білім алуда.
Шетелдік діни оқу орындарын екіге бөліп қарастырған жөн. Біріншісі, Қазақстан мұсылмандары діни басқармасы шетелдегі танымал жоғары оқу орындарымен ресми түрде меморандумға отырған, екіншісі, Қазақстан мұсылмандары діни басқармасы меморандумға отырмаған шетелдік діни оқу орындары. Әрине, азаматтардың ҚМДБ-мен меморандум жасасқан шетелдік діни оқу орындарына барып, білім алуына болады. Себебі ондай діни оқу орындары дәстүрлі дінімізді үйрететін мамандармен толықтырылған. Ал, Пәкістан, Сауд Арабиясы Корольдігі, Иран, Катар, Кувейт, Йемен, БАӘ сияқты өзге де мұсылман мемлекеттеріндегі күмәнді діни оқу орындарынан білім алып келген студенттер халық арасында деструктивті діни идеологияның таралуына себепші болып жатқаны рас. Деструктивті діни ағымдар дегеніміз – дәстүрлі діндерден бөлінген, оларды дін ретінде мойындамайтын, жеке көзқарастарымен діни догматикаларын қалыптастырған, мемлекеттің ішкі тұрақтылығы және қоғамдық құрылыстарға кері әсерін тигізуші тар шеңберлі көзқарастағы адамдардан құралған топ. Деструктивті діни ағымдардың басшылары көбіне заңға қайшы келетін қылмыстық әрекеттерге барып, қарапайым топ мүшелерінің саналарын түрлі манипулияциялық амалдармен жаншып, тоталитарлық жолмен бағындыруға тырысады.
Міне, осындай тар түсініктегі шетелдік күмәнді діни оқу орындарында оқыған жастар отанына оралып, деструктивті діни ағымдардың идеологиясын таратудың нәтижесінде Қазақстанның әр аймағында терролық әрекеттер орын алды. Атап айтқанда 2011 жылғы мамырдың 17-інде Ақтөбедегі ҰҚК департаментінің ғимаратында 25 жастағы Рахымжан Махатов өзін-өзі жарып жіберді. Бір апта өткен соң, 24 маусымда Астанадағы ҰҚК-нің тергеу изоляторы маңайында «Ауди-100» маркалы көлігі жарылды. Тергеу нәтижесіне сенсек, Сергей Подкосов есімді орыс мұсылманына тиесілі жарылғыш зат жарылған. Ал 2011 жылдың 12 қарашасында Тараз қаласының тұрғыны жалғыз өзі террорлық әрекет ұйымдастырды. Оқиға барысында террористің ізін кескен екі қызметкер қылмыскер қолынан қаза болды. 34 жастағы Мақсат Қариевті құқық қорғау қызметкерлері ұстамақ болғанда жиһадшы өзін өзі жарып жіберген. Ақтөбе қаласында 2016 жылдың 5 маусымы күні экстремисттік көзқарастағы 26 азамат «Паллада» қару-жарақ-дүкеніне кіріп, суық қаруларды ұрлап шыққан. Салдарынан қару дүкенiнiң сатушысы мен оқиға орнына бiрiншi болып жеткен күзет қызметкерi қаза тапты. Ал екiншi қару дүкенiне келген адам пышақ жарақатынан мерт болды. Жалпы алғанда, 3 бейбiт адам көз жұмып, 2 адам жараланды. Осындай шабуылдардың салдарынан 9 адам қаза тауып, 38 адамның әртүрлі дене жарақаттарын алған.
Жоғарыда аталған террорлық оқиғаларға итермелейтін күш шетелдік деструктивті діни оқу орындарының білімдері мен жат құндылықтарының нәтижесі. Шетелдік күмәнді діни оқу орындарында тәкфирлік, жиһадилік радикалдық құндылықтарды үйретеді. Осындай күмәнді діни оқу орындарын тәмәмдап келген азаматтар санасы таза жастардың миын улап, діни экстремистік идеяларды құю нәтижесінде жоғарыдағыдай трагедиялық оқиғалар орын алып отырған. Жоғарыда аталған террорлық оқиғалардың барлығы қазақ халқының тәуелсіздігіне, конфессияаралық татулығына, зайырлылық құндылықтарына, қазақи болмыс және ұлттық дәстүрлермізге қарсы жасалған әрекет болып саналады. Қоғамда қалыптасқан құндылықтарға қарсы әрекет жасауға итермелеген кімдер деген сұраққа, әрине күмәнді шетелдік діни оқу орындарында сабақ берген ұстаз, шейхтар деп айтар едім. Шетелдік діни оқу орындарының ұстаздары қалай біздің жастарды уысына түсірді деген сауал баршаны мазалайтыны жасырын емес. Діни білім алу үшін мұсылман елдеріне кеткендердің елеулі бөлігі жеке қорлар арқылы аттанған еді. 2011-2012 жылдары дін саласындағы уәкілетті орган жариялаған мәліметтерге сәйкес мұсылман елдерінде діни білім алып жүрген жастар саны 392 болса, соңғы үш жыл көлемінде олардың саны 300-ге жуық деген мәлімет айтылуда.
Орта Азия аумағында іс-әрекет жүргізген шетелдік қайырымдылық қорлары мен қоғамдық ұйымдар Қазақстанда да араб тілін оқытатын жаздық лагерлерді, медреселерді, колледж және университеттерді ашуға демеушілік жасады. Олардың ішінде төмендегі қорлар ерекше белсенділік танытты:
— «Ислам жастарының ассамблеясы» үкіметтік емес ұйымы (Сауд Арабиясы Корольдігі);
— «Әлеуметтік реформалар қоғамы» қайырымдылық ұйымының қоғамдық қоры (1998 жыл, Кувейт);
— «Кәусар» корпоративтік қоры (2005 жыл, БАЭ);
— «Таиба» халықаралық қайырымдылық қоры (1993жыл, АҚШ, САК);
— «Әл-Бабтин» қоғамдық ұйымы (1993 жыл, Кувейт);
— «Қатар қайырымдылық қоғамы» қоғамдық қоры (1997-2000 жылдар, Қатар);
— «Ибрагим бин Абд әл-Азиз әл-Ибрагим» қайырымдылық қоры (САК).
Аталған қорлар ауқымды қаржыларын пайдаланып, қазақстандық білім беру жүйесіне енуге ерекше талпыныс жасай отырып, шетелдік діни ұйымдар еліміздегі жекелеген колледждер мен жоғарғы оқу орындарына материалдық және гуманитарлық демеушілік жасау арқылы оқу орындарының ішкі тәртібіне ықпал ету мүмкіндігіне ие болды. Олар оқытушылар мен талапкерлер арасында діни тақырыптарда уағыз-насихат жүргізіп, өздерінің діни деструктивті идеологиялық құралдарын, әдебиеттер мен баспа өнімдерін тарата бастады. Мысал ретінде айтсақ, «Әлеуметтік реформалар қоғамы» («Жамият әл-Ислах әл-Ислами» — 2005 жылы Қазақстан Республикасының Жоғарғы Соттың шешімімен қызметіне тыйым салынған ұйым) кувейттік қайырымдылық қорының елдегі мемлекеттік емес жоғары оқу орындарында псевдосалафилік идеологияны насихатағандығын атап өту жеткілікті.
2005 жылдарға дейін жұмыс жүргізген жоғарыдағыдай ұйымдар дінге қызығушылығы мол азаматтарды шетелдік жоғары діни оқу орындарына бағыттау жұмыстарын жүзеге асырды. Ал шетелдік діни оқу орындарында сырттан келген студенттерге демеушілік көрсетілумен қатар, діни білім көбіне ақысыз негізде ұсынылған. Осындай әрекеттер арқылы азаматтардың мұсылман елдеріндегі оқу орындарына шығуының қарқын алуы және деструктивті діни идеологиямен ауыздануы басталды.
Кейбір жастар тарапынан діни білім алу мақсатында өз бетінше мұсылман елдеріне шығатын үрдіс пайда болды. Қазақстанның азаматтары Сауд Арабиясы Корольдігі, Үндістан, Пәкістан, Қырғыз Республикасы т.б. елдердегі күмәнді діни оқу орындарына оқуға кетіп, шетелдік күмәнді діни оқуы орындары қорларының демеушілігімен қаржыландырылатын және деструктивті діни идеологияны насихаттайтын жеке оқу орындарына – марказдар мен хужраларға тап болып жатты. Мұндай орталарға тап болған ел азаматтары әдетте консулдық тіркеуге тұрмайды және Қазақстан Елшілігімен байланысқа шықпайды. Мемлекет тарапынан бақылаусыз, жасырын шетелдік діни оқу орындарына барған азаматтардың экстремистік ұйымдардың ықпалына еріп, террористік әрекет жасағандары да болды.
Жоғарыда аталған қауіптің алдын алу мақсатында мемлекет тарапынан 2011-жылдардан бастап, тұрақты түрде жүргізілген ақпараттық-түсіндіру жұмыстарының нәтижесінде Қазақстан азаматтарының шетелге діни білім алу мақсатымен бақылаусыз аттануы біршама тежелді. Осыған орай, діни білімге қызығушы бар азаматтар шетелдік діни оқу орындарына бармай-ақ отандық діни білім оқу орындарында білім алғаны жөн. Қазіргі таңда дін мамандарын даярлайтын елімізде 6жоғары оқу орны бар.
Олар: Нұр Мүбарак Египет ислам мәдениеті университеті, Әл-Фараби атындағы ҚазҰУ, Л.Гумилев атындағы ЕҰУ, Қ.А.Яссауи атындағы ХҚТУ, шет тілдер және іскерлік карьера университеті, Е.Букетов атындағы Қарағанды мемлекеттік университеті. Сондай-ақ 9 медресе-колледждерде діни білім алуға болады. Олар: Сарыағаш колледжі, Астана медресе колледжі, Әбу Бәкір Сыддық медресе колледжі, һибаттулла Тарази медресе колледжі, Үшқоңыр медресе колледжі, Шымкент медресе колледжі, Әбу Ханифа медресе колледжі, Ақтөбе медресе колледжі, Орал медресе колледжі.
Аталған отандық діни оқу орындарының материалдық-техникалық базасының күшеюі, білім сапасының артуы ел азаматтарының діни білімді өз елінде алуға мол мүмкіндік барын анық көрсетеді. Қазақ елінің рухани қауіпсіздігі ұлттық қауіпсіздікпен тікелей сабақтас. Осы себепті діни білім алуды таңдаған ұл-қыздары бар ата-аналар перзенттерінің жарқын болашағы үшін оларды өз Отанында оқытуға барынша мән беруі тиіс. Отандық діни оқу орындары халықтың діни танымынан, ұлттық ерекшеліктерінен терең хабары бар азаматтарды тәрбиелеп шығарады. Қазақы рухани қайнар көздерден сусындаған және олардың қадірін білген шәкірт дін саладағы істердің жандануына мол үлесін қосатыны сөзсіз.
Ерзат Жақыпов, облыс әкімдігі «Дін проблемаларын зерттеу орталығының» бөлім басшысы.
Comments are closed.