АСТАНА. ҚазАқпарат — Егер жұмыскердің кірісі 25 АЕК-тен аспаса, жұмыскердің салық салынатын кірісі сомасынан 90 % мөлшерінде табыс салығынан босатылады, деп хабарлайды ҚазАқпарат.
Айта кетейік, тиісті заңнамаға түзетулер 2018 жылы енгізілген болатын. Бұл норма 2019 жылғы 1 қаңтардан бастап қолданысқа енеді.
«2019 жылдан бастап, егер жұмыскердің кірісі 25 АЕК-тен аспаса, жұмыскердің салық салынатын кірісі сомасынан 90 % мөлшерінде түзету қолданылатын болады. Тиісінше, егер жұмыскердің есептелген кірісі 25 АЕК-тен асқан жағдайда, жұмыскердің салық салынатын кірісі сомасынан 90% мөлшерінде түзету қолданылмайды», — делінген ҚР Қаржы министрлігі Мемлекеттік кірістер комитеті мәліметінде.
Жеке тұлға еңбек қызметін бірнеше жұмыс берушіде жүзеге асырған жағдайда және әрбір жағдайда жұмыскердің есептелген кірісі 25 АЕК-тен аспаса, онда жұмыскердің салық салынатын кірісі сомасынан 90 % мөлшерінде түзетуді әрбір жұмыс беруші қолданатын болады.
Айта кетейік, ҚР Парламенті палаталарының бірлескен отырысы ҚР Президенті Нұрсұлтан Назарбаев төмен жалақы алатындарға салықтық жүктемені жеңілдетуді ұсынды.
«Салыстырмалы түрде жалақысы төмен қазақстандықтарды қолдау үшін 2019 жылдың 1 қаңтарынан бастап олардың салық жүктемесін 10 есеге азайтып, 1 процент қана салық салуды ұсынамын. Ай сайын ең төменгі есептік көрсеткіштің 25 еселенген көлемінен аз жалақы алатындарға салынатын жеке табыс салығын азайту арқылы олардың салық жүктемесін жеңілдету керек», — деген еді Мемлекет басшысы.
Comments are closed.