Немере шіркін, тәтті екен!
Қандай тәтті сүйкімді,
Пейілің мен қылығың!
Көңіліме күй тұнды,
Томпаңдаған құлыным.
Қадамың сенің алғашқы,
Өмір мәні – гүлсің-ау.
Өзің байқап аңғаршы,
Менен аумай тұрсың-ау!
Көргендеймін бұлақты,
Жарқырайсың күндей дәл.
Жүрегіме шуақты,
Сен сыйладың, Нұрдидар!
Дүбірлі бұл әлемге,
Ойлы көзбен қарарсың.
Құмар болып өлеңге,
Сен де бәлкім, жазарсың.
Бәрімізге – қуаныш,
Өзің үйдің сәні де.
Жаныма сен – жұбаныш,
Дертіме ем, дәрі де.
Ашық болып аспаның,
Нұрын төгіп, күн күлсін.
Әрбір қадам басқаның,
Сәтті болсын бүлдіршін!
Мен осынау ғаламда,
Тынысты кең алайын.
Әке-шешең, саған да,
Тілекшің боп қалайын.
Арайлы атқан әр таңда,
Қызығыңды байқайық.
Мен бәріңнің ортаң да,
Отырайын марқайып.
Тоқтабибі Әлменова.
Меркі ауданы.
Comments are closed.