Ертең Тараз мемлекеттік педагогикалық университетінде «Төртінші өнеркәсіптік революция жағдайындағы білім беруді дамытудың жаңа мүмкіндіктері: заманауи білім берудегі инновациялар мен әдістемелер» атты I республикалық педагогикалық оқулары өтеді.
Республикалық педагогикалық оқулар Қазақстанның рухани жаңғыру бағытында ұлттық сананы қалыптастыру, қазақстандық жаңартылған білім беру моделін құру, білім берудің жаһандану жағдайында педагогикалық кадрларды кәсіби дайындаудың теориялық-әдіснамалық негіздерін қарастыруды мақсат етіп отыр. Сондай-ақ, жиында ғаламдық бәсекелестік ортадағы заманауи білім берудің жаңа парадигмалары аясында зияткер тұлғаны қалыптастыруда инновациялық озық іс-тәжірибені үйрену, педагогтың шығармашылық әлеуетін жетілдіру, оқытудың ғылыми-әдістемелік деңгейін және білім сапасын арттыру жолдарын қарастыру бойынша жұмыстар жасалады.
I республикалық педагогикалық оқулар Қазақстан Республикасының Президенті Н.Назарбаевтың Қазақстан халқына кезекті Жолдауындағы: «Барлық жастағы азаматтарды қамтитын білім беру ісінде өзіміздің озық жүйемізді құруды жеделдету қажет. Білім беру бағдарламаларының негізгі басымдығы өзгерістерге үнемі бейім болу және жаңа білімді меңгеру қабілетін дамыту болуға тиіс. … Педагогтарды оқыту және олардың біліктілігін арттыру жолдарын қайта қарау керек болады» — деп көрсетілген 7-ші басым бағытының идеяларын жүзеге асыруға бағытталған.
Сонымен қатар, шара аясында «Пәннің үздік оқу-әдістемелік кешені (үздік портфолио)», «Үздік оқулық (оқу құралы, оқу-әдістемелік құрал)», «Үздік электронды оқулық», «Үздік мультимедиалық өнім», «Үздік инновациялық сабақ (тәрбиелік іс-шара)», «Үздік инновациялық жоба», «Үздік авторлық бағдарлама», «Үздік мастер класс» аталымдары бойынша байқаулар өткізіледі. Ұйымдастырушылар бұл арқылы жаңашыл мұғалімдердің инновациялық озық іс-тәжірибені үйрену, зерттеу, тарату, насихаттау және жинақтауына жол ашып, креативті-шығармашылық әлеуетін жетілдірмек.
Comments are closed.