«Қазпошта» АҚ бөлімшелерін жаңғыртуда
Бүгінге дейін еліміздің жеті қаласында жаңғыртылған қалалық пошта байланысы бөлімшелерінің пайдалануға берілгені белгілі болып отыр. Олардың қатарында күні кеше ғана үлгі-тіректік құрылым ретінде тұрғындарға есігін айқара ашқан Тараздағы № 19 пошта бөлімшесі де бар.
«Қазпошта» АҚ облыстық филиалының құрамына кіретін 34 қалалық, 10 аудандық, 156 стационарлық және 3 жылжымалы ауылдық байланыс бөлімшелерінде бүгінде 1062 адам қызмет етеді. Сондай-ақ, облыс тұрғындарына қызмет көрсету желісін кеңейту мақсатында 31 коммуналдық, салық және басқа да төлемдер қабылдау пункттері құрылған.
Ал жаңғыртылған қалалық пошта бөлімшесі болса, алдағы уақытта өз аумағына кіретін № 7, 8, 9, 10 және 11 шағын аудандар тұтынушыларына пошталық, қаржылық және агенттік қызметтер көрсетеді. Мұнда штаттық кестеге сәйкес мекеме басшысынан бөлек 4 оператор, халыққа қызмет көрсету орталығының бір операторы және залдағы тұтынушыларға көмекші ретінде тағайындалған бас-аяғы алты-ақ қызметкер бар. Басқа бөлімшелерден артықшылығы сол, мұнда тұрғындардың уақытын үнемдеуге қолайлы бірыңғай электронды кезек жүйесі, пошта жөнелтілімдерін тіркеу бағдарламасы, коммуналдық, салық төлемдерін, постаматқа сәлемдемелер қабылдау, терминалдық-қаржылық, басқа да қызмет түрлері ұсынылады. Алдағы уақытта мерзімдік басылымдарға электронды жазылым жүйесін жүзеге асырмақ. Міне, осындай қыруар іс ықшам топ пен жаңа технологиялар күшімен жүзеге асырылады. Оның үстіне мекеме «POST-24» өзіне-өзі қызмет ету аумағы бойынша тәулік бойы жұмыс істейтін болады.
Баймаханбет АХМЕТ,
«Ақ жол».
Comments are closed.