«Sozaqqa barsań kúıshimin deme, Shaıanǵa barsań, ánshimin deme» degen sózdi sarysýlyq ónerpazdarǵa da arnap aıtsa da jarasatyndaı. Áıgili La Skala teatry sahnasynda án salǵan Amangeldi Sembın, Alashqa aty máshhúr kompozıtor Ilá Jaqanov, dástúrli án óneriniń maıtalmany Sáýle Janpeıisovanyń Sarysýdyń sartap dalasynan túlep ushqany, olardyń izin Ardaq Isataeva, Aıgúl Maqashevanyń jalǵap júrgeni beker bolmasa kerek.
Ótken aptada Tarazdaǵy «Jeńis» saıabaǵynda Jastar jylyna jáne oblystyń 80 jyldyǵyna oraı, oblystyq halyq shyǵarmashylyǵy ortalyǵynyń uıymdastyrýymen ótip jatqan «Jambylym qandaı tamasha!» atty is-sharada ónerlerin kórsetýge sarysýlyqtar kelip jetti.
Konsertti jas ánshiler Meıirjan Omarov pen Móldir Musaeva «Qazaq eli» ánimen ashty. Ǵalymjan Tezekbaev pen Berik Serikbaev birigip shyrqaǵan «Máńgilik el» áni de kópshiliktiń kóńilinen shyqty. Ózge de jas ánshiler «Mereke», «Qyzymyn eldiń», «Qazaqstan», «Otanym – Qazaq eli», «Sen meni umytpa», «Boz oramal» ánderin shyrqap, jınalǵan jurttyń alǵysyna bólendi. Olardyń oryndaýshylyq sheberlikteri tyńdarman tarapynan «Jaqanov pen Sembınniń, Janpeıisovanyń izbasarlary osyndaı bolmaı, qaıtedi?» degendeı rızashylyq týdyrdy. Dombyranyń shanaǵynan kúı kúmbirlep, qyzdardyń qımylymen ásem bı jarasymyn tapty. Bul rette aýdandyq mádenıet úıiniń dırektory Jumakúl Smanqulovanyń eńbegin aıta ketken jón.
Taraz qalasynyń turǵyny, eńbek ardageri Kósherbek Jumanqulov «Jeńis» saıabaǵynyń mańynda turatynyn, sońǵy kezde bul demalys ornynyń keremet gúldenip, aýdandardan kelip jatqan ónerpazdardyń konsertimen ajarlana túskenin aıtady. Biz sarysýlyqtardy bastap kelgen azamattarmen tildestik.
– Óner – qaı jerde de óner. Biz búgin osynda Sarysý jeriniń án sálemin, jyr sálemin, kúıi men bıin alyp kelip otyrmyz. Asanáli, Ilá, Amangeldilerdi týdyrǵan topyraqtyń búgingi jas ónerpazdary da qara jaıaý emes ekenin dáleldedi dep oılaımyn. «Jeńis» saıabaǵyn jaz boıy ánge bólegen bul is-shara – óte jaqsy joba. Aldaǵy ýaqytta da aýdandardyń Tarazǵa án tartýy úzilmeıdi degen oıdamyn. Oǵan sarysýlyqtar qashanda daıyn, – deıdi aýdan ákimdigi mádenıet jáne tilderdi damytý bóliminiń basshysy Muratbek Esmurzaev.
Comments are closed.