- Advertisement -

Tomasov «Astanany» kelesi kezeńge alyp shyqty

25

- Advertisement -

Fýtboldan Eýropa lıgasynyń ekinshi elektik kezeńi aıaqtaldy. Ekinshi irikteý kezeńinde qazaqstandyq úsh komanda baq synaǵan bolatyn. Ókinishke qaraı Almatynyń «Qaıraty» men Shymkenttiń «Ordabasy» fýtbol klýbtary úshinshi kezeńge joldama ala almaı, joryqtaryn toqtatty. El chempıondary «Astana» fýtbolshylary ǵana jankúıerler artqan senim údesinen shyǵa bildi.
Andorranyń «Santa-Koloma» fýtbol klýbymen syrt alańda teń oınaǵan Qazaqstan chempıondary óz alańynda jeńiske jetýi tıis edi. Bul jupta elordalyqtardyń mereıi ústem bolatyndyǵyna eshkim kúmán keltirmegen. Óıtkeni andorralyq klýb bul juptyń anyq aýtsaıderi sanalǵan. Áıtse de olar kezdesýdiń birinshi kezeńinde ólispeı berispeıtinin baıqatyp, sensasıa jasaǵanyn aıta ketken jón.
Nur-Sultan qalasynda ótken oıyn elordalyq komanda úshin sátsiz bastaldy. Kezdesýdiń 7-mınýtynda andorralyqtar esep ashyp, kelesi kezeń joldamasyna bir taban jaqyndaı tústi. Goldyń avtory – Enrık Pı. Osy sáttе jankúıerlerdiń júregi atqaqtap ketkeni ras. Biraq elordalyqtar qalaıda jeńiske jetý kerektigin túsindi. Qaýipti shabýyldar uıymdastyra bastady. Oıynnyń 24-mınýtynda «Santa-Koloma» qorǵaýshylarynyń biri aıyp alańynda ereje buzyp, tóreshi 11 metrlik núkteni kórsetti. Rýnar Mar Sıgýronsson múmkindikti múlt jibermeı, tarazy basyn teńestirdi.
Nátıjeli teń oıyn andorralyqtardy kelesi kezeńge alyp shyǵatynyn berik túsingen «Astana» fýtbolshylary shabyldaryn údete tústi. Alaıda birinshi kezeńde tablodaǵy kórsetkishke ózgeris engize almady. Kezdesýdiń 60-mınýtynda jasyl alańǵa shyqqan Marın Tomasov bul kúni elordalyqtardy úshinshi elektik kezeńge alyp shyqty. Ol 73-mınýtta esepti 2:1-ge jetkizse, 79-mınýtta ekinshi márte gol soqqan Marın tóreshi qosqan qosymsha mınýtta het-trık avtory atandy. Osylaısha «Astana» 4:1 esebimen jeńis toıyn toılady. Marın Tomasov – oıynnyń naǵyz qaharmany. Endi elordalyqtar Maltanyń «Valletta» fýtbol klýbymen kezdesedi. Kelesi kezeńniń kezdesýleri segizinshi jáne on besinshi tamyzda ótedi dep josparlanǵan.
Ekinshi kezeńde baq synaǵan Shymkenttiń «Ordabasy» fýtbol klýby chehıalyq «Mlada-Boleslav» fýtbol klýbynan aılasyn asyra almady. Qarymta kezdesýde shymkenttikter qarsylastaryna 2:3 esebimen jol berip, dodany erte aıaqtaýǵa májbúr boldy. Jankúıerler senim artqan Almatynyń «Qaıraty» da eýrojoryqty ekinshi kezeńde aıaqtap otyr. Izraıldiń «Hapoel» Beer-Sheva komandasymen kezdesken almatylyqtar qarsylastarymen 1:1 esebimen teń tústi. «Qaırat» fýtbolshylary birinshi oıynda 0:2 esebimen «Hapoelge» jol bergen edi. Qarymta kezdesýde janarlarynda jasyn oınaǵan almatylyqtardyń saǵyn tóreshi syndyryp tastady. Qazaqstandyq komandanyń oıynshylary Eldos Ahmetov pen Gafýrjan Súıimbaevty alańnan qýǵan tóreshi durys sheshim qabyldamaǵan sıaqty. Oǵan jankúıerler de narazylyq bildirdi. Alaıda nátıje ózgermeıtini anyq. Endi biz tek «Astananyń» jolyna úmitpen qaraımyz.

Tabıǵat ABAILDAEV.

Comments are closed.

Page Reader Press Enter to Read Page Content Out Loud Press Enter to Pause or Restart Reading Page Content Out Loud Press Enter to Stop Reading Page Content Out Loud Screen Reader Support