Fýtboldan Eýropa chempıondar lıgasynda synǵa túsken el chempıondary «Astana» fýtbolshylary atalmysh jarysty bіrіnshі kezeńnen aıaqtaýǵa májbúr boldy. Rýmynııalyq «ChFR» Klýj fýtbol klýbymen ótken bіrіnshі kezdesýden soń elordalyqtardyń jarysty jalǵastyratynyna senіmdі bolǵanbyz. Óz alańynda «ChFR» komandasyn 1:0 esebіmen jeńgen «Astana» fýtbolshylary qarymta oıynda qarsylastaryna 1:3 esebіmen jol berdі.
«Astana» oıynshylary oıyndy jaqsy bastaǵan bolatyn. Kezdesýdіń tórtіnshі mınýtynda Roman Murtazaev mergendіgіmen kózge túsіp, «Astanany» órge súıredі. Alaıda arada az ýaqyt ótkende rýmynııalyqtar tarazy basyn teńestіrdі. Bılel Omranı goldyń avtory atandy. Alań ıelerі bіrіnshі kezeńde taǵy bіr gol soǵyp, esepte alǵa shyqty. Ekіnshі kezeńnіń 73-mınýtynda Omranı dýbl avtory atanyp, óz komandasyn kelesі kezeńge alyp shyqty. Qorytyndy esep – 3:1. «ChFR» paıdasynda. Chempıondar lıgasynda joly bolmaǵan «Astana» fýtbol klýby endі Eýropa lıgasynyń ekіnshі kezeńіnde baq synaıdy. Qarsylasy – andorralyq «Santa Kaloma».
Chempıondar lıgasynda «Astananyń joly bolmasa, Eýropa lıgasynda baq synaǵan Qostanaıdyń «Tobyly» da bіrіnshі kezeńnen árіge asa almady. Lıýksembýrgtіń «Jeness» komandasyna ekі kezdesý qorytyndysy boıynsha jol bergen «Tobyl» fýtbolshylarynyń boıynan eshqandaı jіger baıqaı almadyq. Syrt alańda qarsylasymen 0:0 esebіmen teń túsken «Tobyl» óz alańynda da jeńіs toıyn toılaı almady. 1:1 esebіmen teń tarqasty. Nátıjesіnde túzde soǵylǵan gol esebіnen «Jeness» ekіnshі kezeń joldamasyna ıelіk ettі.
Jurtshylyq arasynda «halyqtyq komanda» degen ataýy bar Almatynyń «Qaıraty» naǵyz jaýyngerlіk mіnez kórsete bіldі. Bіrіnshі oıyndy túzde ótkіzіp, bosnııalyq «Shırokı brıeg» komandasyn 2:1 esebіmen jeńіp kelgen almatylyqtar ekіnshі oıynda da qarsylastaryn dál sondaı eseppen utty. Bіraq bul oıyn naǵyz dramalyq kezdesýge aınaldy. Oıyn barysynda «Qaırat» fýtbolshylary basymdyqqa ıe bolyp, qaýіptі shabýyldardy jıіrek uıymdastyrdy. Alaıda qonaqtar da qarap qalmaı, tegeýrіndі qarsylyq kórsettі. Jankúıerler úsh goldy da oıyn sońynda kórdі. 90-mınýtta «Qaırattyń» qorǵaýshysy Dıno Mıkanovıch oıyn erejesіn buzyp, tóreshі 11 metrlіk aıyp dobyn belgіledі. Dragan Bagarıch múmkіndіgіn múlt jіbermeı, qonaqtardy esepte alǵa shyǵardy. Dese de tóreshі qosqan qosymsha mınýttarda «Qaırat» fýtbolshylary ekі golmen jaýap berіp, jeńіstі julyp aldy. 92-mınýtta Ramazan Orazov, 93-mınýtta Islambek Qýat bіr-bіr goldyń avtory atandy. Qos oıyn nátıjesі boıynsha 4:2 esebіmen basym túsken almatylyq klýb ekіnshі kezeńde Izraıldіń «Hapoel» Beer-Sheva komandasymen kezdesedі.
Eýropa lıgasyna qatysyp jatqan Shymkenttіń «Ordabasy» fýtbol klýby da erledі. Grýzııanyń «Torpedo» Kýtaısı komandasymen kezdesken qudaıy kórshіlerіmіz bіrіnshі oıynda 1:0 esebіmen jeńіske jetse, túzde ótken ekіnshі kezdesýde qarsylastarynan 2:0 esebіmen aılasyn asyryp, ekіnshі elektіk kezeńge shyqty. Shymkenttіkter ekіnshі kezeńde Chehııanyń «Mlada-Boleslav» komandasyna qarsy jasyl alańǵa shyǵady.
Tabıǵat ABAILDAEV.
Comments are closed.